ТМД елдері арасында әзірге баламасы жоқ «Ринг королі» спорттық турнирі Петропавлда осымен үшінші рет өткізіліп, халықаралық сипат алуымен ерекшеленді.
Облыстық әкімдіктің қолдауына сүйенген Дене шынықтыру және спорт басқармасы еліміздің өңірлерінен және Ресейден жиналған бокс ардагерлері арасында төрт күндік іріктеу жарысын ұйымдастырып, кіл мықтылар ақтық сайысқа жолдама алды. Күрзі жұдырық иелері арасында 3 халықаралық дәрежедегі спорт шеберінің, 13 спорт шеберінің, Азия ойындарының чемпиондары мен жүлдегерлерінің болуы бокс десе, ішкен асын жерге қоятын жанкүйерлердің зор қызығушылығын тудырды.
Тартысты бәсекені аймақ басшысы Құмар Ақсақалов, бокстан Еуропа жеңімпазы, Әлем кубогының күміс жүлдегері Серік Нұрқазов тамашалады.
Шаршы алаңға бірінші болып Нұр-Сұлтан қаласының 36 жастағы өкілі, жазғы Олимпиадаға қатысушы Миржан Рахымжанов пен 63 жастағы атыраулық Адик Бермешов көтерілді. 64 кило салмақ бойынша күш сынасқан екеуі де жақсы дайындықпен келгендерін байқатты. Бірінші раундтан кейін М.Рахымжанов өзінен 27 жас үлкен ағасына інілік ізетпен жол берді. Оның бұл қадамына жиналғандар үлкен қошемет көрсетті.
Петропавлдық Мұрат Құрманғожинов (69 кг) былтырғы турнирдің жеңімпазы Рустам Жақыповты бірден ауыр соққының астына алып, жерге сұлатып салды. Қалған салмақтар бойынша астаналық Александр Лучшев (75 кг), қарағандылықтар Қуаныш Исембаев (81 кг), Тимур Байсеркеев (91 кг-ға дейін) жеңіс тұғырының ең биік сатысына көтерілді.
Ал 91 килодан жоғары аса ауыр салмақта қос ресейлік Сергей Таннагашев пен Сайран Смайылов қолғап түйістірді. Әскерилер арасында әлем чемпионы С.Смайылов жерлесінің бойшаңдығына, қолдарының ұзындығына қарамастан, әбжіл қимыл танытып, айласын асырды. Сөйтіп, өткен жылы алаң иесі Андрей Бейсенбаевтан ұтылып қалған есесін қайтарды. Оған «Ринг королі-2019» белдігін Құмар Іргебайұлы салтанатты түрде тарту етті.
Жеңімпаздар мен жүлдегерлерге ақшалай сыйлықтар да тапсырылды.
Солтүстік Қазақстан облысы