Жуырда Петропавл қаласында Қазақстан халқы Ассамблеясы облыстық бөлімшесінің ғимаратында Дүние жүзі қазақтары қауымдастығы филиалының ұйымдастыруымен М.Қозыбаев атындағы университеттің «Foundation» (негіз) факультетінде оқып жатқан шетелдік студенттермен кездесу болды. Олар қазақстандық жоғары оқу орындарына түсу үшін дайындық курсынан өтіп жатыр.
Ұзын саны алпыс шақты студент Ресей, Қытай, Моңғолия және басқа да елдерден келді. Туған үйлерін сағынған жастар өздерімен кездесуге келген қызылжарлық ақсақалдар мен апаларға жылыұшырай қарайды. «Foundation» факультеті 2016 жылы ашылған. Осы курста бір жыл оқып, дайындықтан өткен жастар қабілетіне қарай кейін түрлі факультеттерге оқуға түседі.
Мерекелік шараны ұйымдастырған қауымдастықтың облыстық филиалы кездесуге өнер ұжымдарының өкілдерін шақырыпты. Соның ішінде әжелердің «Балқадиша» ансамблі студенттердің алдында ән шырқап, би биледі. Сондай-ақ облыстық филармония мен С.Мұқанов атындағы қазақ театрының артистері әсем әндер мен төгілген күйлерін шертті. Басқа ұлт өкілдері көп Петропавлда қоңылтақсып жүрген жастар бір мезгіл серпіліп, көңілдері көтеріліп қалды. Қалың қазақтың ортасынан келген жастардың қатты қуанғаны көрініп тұрды. Алыс-жақын шетелдерден келген қазақтар да осы жерге жиналып, жастарға өздерінің ақыл-кеңестерін айтып жатты.
Ресейдің Қорған облысында тұрған, сондағы қазақ ұлттық-мәдени орталығын құруға белсене қатысқан Боранбай Бижігітовті әңгімеге тарттық. Жасы жетпіске келген ақсақалдың Қызылжарға қоныс аударғанына бес жыл болыпты. «Бірақ Ресейде қалған туған-туыстарды, қандастарды ұмытпаймыз. Өзім Қорғанның Макушино деген ауданында туып-өстім. Партия мен кеңес органдарында, түрлі кәсіпорындарда басшылық қызметтерде болдым. Барлығы алты балам бар еді, бір ұл, бір қызым әлі де сол жақта тұрып жатыр. Қалғаны атамекенге оралды. Өзім Қорған облысының «Қазақ тілі» қоғамында жиырма бес жыл бойы белсенді болдым. «Қазақтың ұлттық-мәдени автономиясын» Ресейде ең бірінші біз аштық. Қазақ тілінде «Бірлік» деген газет шығарып тұрдық. Радиодан да өз хабарымызды беріп тұрдық, бірақ телехабар ашуға шамамыз келмеді. Соны ашамыз деп көп әурелендік. Соңғы 25 жылда біз Қорған облысының барлық ауданында 20 құрылтай өткіздік. Қазір ол жақта он бес мыңдай қазақ тұрады. Мына оқуға келіп жатқандардың арасында да біздің жастарымыз бар. Жуырда Макушин ауданының бір мектебінде бірінші қазақ сыныбын ашуға қол жеткіздік. Оған отыз шақты бала қабылданды. Оқу қазақстандық бағдарламамен оқытылады. Қазір Қорған облысындағы ұлттық-мәдени автономиясының басшысы Қайрат Оралов есімді жас жігіт. Осы сыныптың ашылуына сол жігіт көп еңбек сіңірді. Бізге ауданның бұрынғы әкімі, қазіргі Мемлекеттік думаның депутаты Василий Шишкоедов көп көмек берді. Мұғалімдері Алтынай Бекішова – қазақстандық келін. Осы жерде қазақша бастауыш мектепті бітіргендер кейін Қазақстанға келіп, оқуын жалғастыратын болады деген үміттеміз», дейді ақсақал.
Студент жастардың алдында қызылжарлық қоғамдық белсенділер, әнші, ақын Дәстен Баймұқанов, ежелгі педагог Жангелді Тәжин, «Ұрпақ» мәдени орталығының жетекшісі, ғалым Гүлбақша Мұсабаева, «Шабыт» фестивалінің лауреаты, ақын Аманжол Зағыпар және т.б. сөз сөйлеп, жастарды оқу бітірген соң атамекенде қалуға шақырды. Жергілікті билік тарапынан жиында арнайы өкіл болмағанымен қоғам өкілдері қазақтардың көбейгеніне, көшіп келгендеріне қуанышты екендерін жеткізді.
Солтүстік Қазақстан облысы