Бүгін Бесқарағай ауданына жаңа әкім таныстырылды.
Бүгін Бесқарағай ауданына жаңа әкім таныстырылды. «Аймақ басшысының өкімімен бұл лауазымға облыс әкімінің орынбасары қызметін атқарған Шалқар Заманбекұлы Байбеков тағайындалды. Ол 2017 жылдан бері ауыл шаруашылығы, табиғи ресурстар, жер қатынастары мен ветеринария салаларына жетекшілік етті» делінген облыс әкімінің баспасөз қызметі таратқан мәліметте.«Шалқар Заманбекұлы – өте тәжірибелі басқарушы. Оның кандидатурасын мәслихат депуттары бірауыздан қолдады. Ол өзінің тәжірибесін Бесқарағай ауданын дамыту барысындағы маңызды мәселелерді шешуде қолданатынына сенімдімін», – деді Шығыс Қазақстан облысының әкімі Даниал Ахметов аудан активі алдында сөйлеген сөзінде.
Шалқар Байбеков 1967 жылы 6 ақпанда бұрынғы Семей облысы, Абай ауданында дүниеге келген. 1996 жылы Қазақ мемлекеттік басқару академиясын «Экономика» мамандығы, кейін Қазақ мемлекеттік заң академиясын «Заңгер» мамандығы бойынша тәмамдады. Қызмет жолын 1988 жылы Семей облысы Жаңасемей аудандық мемлекеттік сақтандыру инспекциясының аға инспекторы болып бастады. 1990 жылдың шілде айынан бастап Семей салық инспекциясында қызмет етті. 1999 жылы Павлодар қаласы, кейін Астана мен Қарағанды қалаларында Салық комитетінің төрағасы болып жұмыс істеді.
2008 жылдан 2014 жылға дейін Астана қаласы Салық департаментінің Есіл ауданы бойынша салық басқармасын басқарды. Кейін Президент Әкімшілігінің мемлекеттік бақылау және ұйымдық-аумақтық жұмыс бөлімінің мемлекеттік инспекторы болды.
Шығыс Қазақстан облысы