Волейбол. Кеше Италияның Монтикьяри қаласында волейболдан әйелдер арасындағы ХХІ әлем гран-при жарысы басталды.
Бұл сынға «Е» тобында біздің ұлттық құрама да қатысады. Александр Гутор жаттықтыратын команда алғашқы ойынын Германия командасымен өткізеді. Одан кейін алаң иелерімен, ал жексенбіде Аргентина волейболшыларымен күш сынасады.
Волейбол. Кеше Италияның Монтикьяри қаласында волейболдан әйелдер арасындағы ХХІ әлем гран-при жарысы басталды.
Бұл сынға «Е» тобында біздің ұлттық құрама да қатысады. Александр Гутор жаттықтыратын команда алғашқы ойынын Германия командасымен өткізеді. Одан кейін алаң иелерімен, ал жексенбіде Аргентина волейболшыларымен күш сынасады.
Баскетбол. Қазақстанның ерлер құрамасы Филиппинде өтіп жатқан Азия чемпионатында алғашқы жеңісіне жетті.
Біздің құрама Таиландпен кездесіп, 81:67 есебімен ұтты. Бұл ойында бізге тай командасымен ойнау аса қиын болған жоқ. Кездесудің алғашқы бөлігі 42:33 есебімен қазақстандықтар пайдасына шешілді. Таиланд жігіттері ойынның үшінші және төртінші кезеңдерінде есепті теңестіруге тырысқанымен, нәтиже шығара алмады.
Кеше кешкісін жерлестеріміз Бахрейн командасымен ойнады.
Футбол. «Ақтөбе» өз алаңында Исландияның «Брейдаблик» командасын жеңгеннен кейін Қазақстан УЕФА-ның клубтық рейтингісі бойынша 35 орынға көтерілді.
Қазір Қазақстан мен Босния және Герцоговинаның жинаған ұпайлары – 7.500. Алайда, Боснияның «Широки Бриегі» өз алаңында Италияның «Удинезе» командасына 1:3 есебімен есе жіберді. Сөйтіп, Қазақстан УЕФА көрсеткіші бойынша Босния және Герцоговинаны басып озды.
Рейтингіде Испания, Англия, Германия командалары көш бастаса, ТМД елдерінің ішінен Ресей – сегізінші, Украина тоғызыншы орындарда тұр.
Еркін күрес. Испанияның Мадрид қаласында еркін күрестен өткен гран-при турнирінде Қазақстан балуандары Айдар Балданбаев пен Теймураз Тигиев қола жүлдені жеңіп алды.
Айдар 74 килоға дейінгі салмақта австриялық және словакиялық қарсыластарын ұтса, Теймураз 120 кило салмаққа дейінгі сында канадалық Корея Джарвазадан басым түсті. Осы нәтижемен Қазақстан құрамасы турнирдегі қатысқан 20 елдің арасында жалпыкомандалық есепте жетінші орынға тұрақтады.
Велоспорт. «Астана» командасы Голландия чемпиондары Льюва Вестра және Франко Пеллицоттимен келісім-шартқа отырды.
«Astana Pro Team» командасының бас менеджері Александр Винокуровтың айтуынша, Голландияның жекелеген жарыстарындағы биылғы чемпионы Льюва Вестра келесі жылы Винченцо Нибалиға «Тур де Франс» көпкүндігінде көмекші бола алады. «Былтыр Вестра Калифорния туры мен Дания турын жеңді. Сондықтан оған әбден сенуге болады», деді ол. Ал Пеллицотти туралы Винокуров оның тәжірибелі велошабандоз екенін, келесі жылы оның да командаға көп көмектесетінін айтты.
Команда, сондай-ақ, 2015 жылға дейін Дмитрий Муравьев, Борут Бозич, Франческо Гавацци және Паоло Тиралонгомен, 2016 жылға дейін Фабио Арумен келісімшартын ұзартты.
«Егемен-ақпарат».