Әдетте көлік тізгінін ұстау жынысқа бөлінбесе керек-ті. Қазір еркекпен бірдей әйел заты да кез келген көлік құралын жүргізіп жүр. Бұл тіпті таңғалатындай жағдайдан қалған.
Бірақ жол ережесін сақтауға қатысты жүргізген зерттеулер, ерлерге қарағанда әйелдердің ережені жиі бұзатынын анықтаған. Әсіресе, қала ішіндегі жолдарда ережеге бағынбайтын бойжеткендер көп кездеседі екен. Бұрылуға болмайтын тұстарды көрінеу қиып өту, көліктегі ескерту габариттерін іске қоспау, жарық құралы мен ескерту белгілерін ажыратпау сияқты жүргізушілер жібермеуі тиіс қателіктерді айтпағанда, нәзік жандылардың кесірінен болған апатты жағдайлар көбейген. Бұл туралы бізге Талдықорған қаласы полиция басқармасының аға тергеушісі Дидар Сейітжан айтқан еді.
Полиция деректерін саралап отырып, көлік айдаған қыз-келіншектердің кесірінен болған жол-көлік оқиғаларына қатысты бірнеше оқиғаға кезіктік. Мысалы, облыс полицейлері мас күйінде көлік жүргізген әйелді ұстапты. Оқиға Балқаш ауданының орталығы Бақанас ауылында болған. Патруль полициясы күдік туғызған «Тойота Карина» көлігін тексеру үшін тоқтатқан екен. Құжат тексеру кезінде тізгіндегі әйел адамның алкогольді ішімдік ішкені анықталды. Отыз тоғыз жастағы келіншектің мас күйінде көлік руліне отырғанын медициналық сараптама да айқындаған.
Айтпақшы, «Тойота Карина» көлігінің иесі бұған дейін де «қызып алып» көлік басқарғаны үшін айып төлеп, соттың шешімімен 3 жылға дейін автокөлік құралдарын басқару құқынан айырылған екен. Енді ауыл тұрғынын аса үлкен көлемдегі айыппұл мен қоғамдық жұмысқа жегу немесе 5 жылға дейінгі бас бостандығынан айыру жазасы күтіп тұр.
Тағы бір өкінішті жағдай облыс орталығында болған. Талдықорған қаласының соты жылға жуық уақытқа созылған атышулы іске қатысты шешім шығарыпты. Қанды оқиға 2019 жылдың наурыз айында болған еді. 64 жастағы жүргізуші әйел Infiniti көлігінің тізгініне ие бола алмай, автомашина жол бойындағы автобус аялдамасына соғылған. Жоғары жылдамдықпен келген көлік аялдамада тұрған 2 адамды таптап өтіп, 14 жастағы қызды ауыр жарақаттаған. Соққы салдарынан жас жұбайлар оқиға орнында тіл тартпай кеткен.
Жылға жуық жүрген тергеу кезінде адам өліміне себепкер болған жүргізуші әйелге қатысты бұлтартпау шарасы бірнеше рет өзгертілген. Бұл оқиғадан хабардар болған қала тұрғындары наразылық білдірген. Сот шешімі жарияланғалы бері де адамдар жүргізушіге кесілген жазаны тым жеңіл деген пікірде. Ал Талдықорған қалалық соты кінәлі әйелдің жас егделігін және істеген қылмысын мойындап, өкініш білдіргенін есепке алып, 5 жылға шартты мерзімге бас бостандығын шектеуді ұйғарыпты. Айтпақшы, шартты жазаланған әйел 7 жылға дейін көлік басқару құқығынан да айырылыпты.
Көлік демекші, Алматы облысында Ресей, Қырғызстан және Армения елінің есебінде тұратын көлік саны көп. Өкінішке қарай, бұл көлік иелері де жол ережесін белден басып, айыппұл төлеуден жалтарып келген екен. Жолдағы оқиғаларға да себепші болғандары жоқ емес. Өткен жылы шетелдік нөмірлі 37 көлік апатқа ұшырапты. Облыс полицейлерінің дерегінше, аймақ жолдарында болған осы апаттардың кесірінен 80 жолаушы жараланып, 18 адам қайтыс болған.
Алматы облысы