Төтенше жағдайлар кезіндегі талаптарды орындамағаны үшін Батыс Қазақстан облысында 13 жеке кәсіпкерге әкімшілік іс қозғалып, 8 адам қамауға алынды. Батыс Қазақстан облыстық Полиция департаменті баспасөз қызметінің қамауға алынғандардың барлығы да мейрамхана иелері.
- Төтенше жағдай тәртібін бұзған кәсіпкерлерді Қазақстан Республикасының Әкімшілік құқық бұзушылық туралы Кодексінің 425, 430, 476, 478 баптары және 462 баптың 3 тармағы бойынша жауапкершілікке тартуға болады, бұл тізбе түпкілікті емес, - дейді Батыс Қазақстан облыстық Полиция департаменті баспасөз қызметінің жетекшісі Болатбек Белгібеков.
Бүгінге дейін жауапкершілікке тартылған 13 жеке кәсіпкердің бәріне де 476 бап – «Төтенше жағдай режимiн бұзу» айыбы тағылған. Олардың үшеуіне айыппұл салынса, 8-і қамауға алынған. Тағы екі кәсіпкердің ісі сотта қаралып жатыр.
Айта кетейік, төтенше жағдай режиміне байланысты көпшілік орындар, кафе-мейрамханалар түнгі 22.00. сағаттан кейін қызмет көрсетуін тоқтатуы тиіс. Бұл талаптың сақталуын құқық қорғау қызметкерлерімен қатар еріктілер де арнайы рейдтерге шығып бақылауда.
Батыс Қазақстан