Оқушы саны артқан ауыл
Бір кездері бірінші сыныпқа баратын оқушылар азайып кетсе, қазір ондай олқылықтың орны тола бастапты. Бұған дәйек келтірер болсақ, Іле ауданы, Қосөзен ауылындағы №14 мектептің бірінші сыныбына биыл 89 оқушы келіпті.
Оқушы саны артқан ауыл
Бір кездері бірінші сыныпқа баратын оқушылар азайып кетсе, қазір ондай олқылықтың орны тола бастапты. Бұған дәйек келтірер болсақ, Іле ауданы, Қосөзен ауылындағы №14 мектептің бірінші сыныбына биыл 89 оқушы келіпті.
– Біздің мектепте 632 оқушы білім алатын болады. Бірінші сыныпқа келген бүлдіршіндер 4 сыныпқа топтастырылды. Бір қуанарлығы, үстіміздегі жылы ауылымызда демографиялық өсімнің нәтижесі байқалды. Соның алғашқы жемісін білім күні көріп отырмыз. Әсіресе, білім күні жас отбасылардың қуанышы ерекше деуге болады.
Халықтың тұрмысы жақсарған сайын ондаған ұрпақ өмірге келіп, ауылымыздың ажары ашылып, білім ұямызда ұл мен қыздың шат күлкісі естіліп, шадыман тірлік тынысымыз артып, ұстаздарымыздың да жүздеріне күлкі ұялады, – дейді Күләйім Балықбекова.
Сүлеймен МӘМЕТ,
«Егемен Қазақстан».
Алматы облысы.
Ортақ күнге орайластырылды
Астанадағы Л.Н.Гумилев атындағы Еуразия ұлттық университетінде Білім күніне арналған салтанатты жиын өтті.
Оған аталған оқу орнының ректоры Е.Сыдықов қатысып, оқытушы-профессорлар құрамымен студенттерді жаңа оқу жылымен құттықтады. Білім күніне арналған жиынға 80-жылдардағы ардагер, Қазақ КСР-інің Білім министрі, «Парасат» орденінің иегері Қожахмет Балахметов, осы білім ордасының түлегі, Дін істері агенттігі төрағасының орынбасары Ғалым Шойкин және білім-ғылым саласына қызмет етіп жүрген басқа да қонақтар қатысып, жылы лебіздерін білдірді.
Салтанатты жиында Л.Н.Гумилев атындағы Еуразия ұлттық университетінің «Дала сазы» халықтық аспаптар оркестрінің домбырашылар ансамблі және «Біз – біргеміз!» атты студенттер флеш мобы жүріп, университеттің басқа да таланттары өнер көрсетіп, «Дос Мұқасан» тобының ізін жалғаушы университеттің жаңа құрылған вокалды-аспапты ансамблінің алғашқы мерекелік тұсаукесері болып өтті.
Биыл Л.Н.Гумилев атындағы Еуразия ұлттық университетіндегі 66 мамандық бойынша білім алуға 4 мыңға жуық студент түсіпті. Олардың 3067-сі грант иегерлері болса, 344-і «Алтын белгі» алғандар, 251-і халықаралық және республикалық ғылыми және түрлі пәндер олимпиадаларының, 12-сі халықаралық спорт жарыстарының жеңімпаздары екен. Сондай-ақ, биыл студенттер қатарына жеңілдікпен қабылданған 6 мүгедектің, 9 жетім баланың, 49 оралман бауырларымыздың бар екенін айта кеткен жөн.
Дастан КЕНЖАЛИН,
«Егемен Қазақстан».
АСТАНА.