Көрсетері көп көрме

Кеше Тәуелсіздік сарайында «Әлем – шебердің көзімен. Итику Куботаның кимонолары» атты бірігей көрменің салтанатты ашылу рәсімі өтті. Көрмені ұйымдас­тырушылар – Халық­аралық Шодиев қоры, Астана қаласының әкімдігі мен Жапония­ның Қазақстан Респуб­ликасындағы елшілігі. Көрме 6-19 қыркүйек аралығында өтеді.

Астана қаласындағы өнерсүйер қауымға әлемдік көркемөнер саласындағы құндылығы жоғары, суретпен көмкерілген жапондық кимоно туындыларының үздік үлгілері ұсынылды. Көрменің рес­ми ашылуына Президент Әкім­шілігінің, Парламент пен Үкі­мет­тің, дипломатиялық корпустың өкіл­дері, кәсіпкерлер, қоғам және өнер қайраткерлері қатысты.

Кәсіпкер, меценат және Ха­лық­аралық Шодиев қорының не­гізін қалаушы Фаттах Шо­ди­ев, Жапонияның Қазақстан Рес­пуб­ликасындағы елшісі Юдзо Харада, Итику Кубота мұра­жа­йының директоры Мияхара Сакуо және Аст­а­на қаласы әкімдігінің өкілі көр­менің ашылуына арнап сөз сөйледі.

Итику Кубота (1918-2003) – ХХ ғасырдағы жапон көркем өнері мен текстилінің атақты шебері. Ол ұзақ жылдар бойы қыл­қалам өнері мен маталарды бояудың өзге де тәсілдерін, пейзаж және портрет салу өнерін зерттеген. Жапондық жібек матаны суреттеудің көне өнерін зерттей отырып, Кубота ондаған жылдар қатарынан оның құпиясын тауып, меңгеруге ұмтылған. Осылай, Кубота өзінің сурет салу бағытын қалыптастырған.

Фудзи тауының түрлі ракурс­тағы суреттері, Күншығыс елінің қайталанбас табиғи сұлулығы ерекше декоративті ландшафтқа бірігіп, бір кимонодан екінші ки­моноға ауысады. Осылай түрлі мезгілдер мен көңіл күй қалып­тастырады. Егер бірнеше кимононы біріктірсе, олар көз тартарлық ерекше сұлу пейзаж бейнеленген суретті құрайды. Өздерінің декоративтілігіне қара­мастан, әрбір кимоно 2,5 метр матадан жасал­ған қылқалам өнерінің туындысы болып табылады. Әрбір кимононы жасауға шебер бір жылға жауық уақытын бөлген. Итику Кубота 2003 жылы 85 жасында қайтыс болған.

2010 жылы Жапониядағы «Итику Кубота мұражайына» бан­крот болу қаупі төнді. Бірегей коллекция бөлшектеліп сатылып, жоғалып кете жаздады. Алайда, мұражайды белгілі меценат Фат­тах Шодиев құтқарып қалды. Ол коллекцияны әлемдік мәдениет үшін толық күйінде сақтап қалу мақсатында және оның өмірінде Жапонияның алатын орнына алғыс ретінде сатып алды.

Халықаралық Шодиев қоры­ның арқасында Астананың әрбір тұрғыны бірегей коллекцияны тамашалай алады.

«Егемен-ақпарат».