Қостанай облысында өткен "Қару" жедел алдын алу шарасы барысында лицензиялық рұқсат ережесін бұзғаны үшін 45 қару иесі әкімшілік жауапкершілікке тартылды. Маусымның сегізінде басталған іс-шара қылмыстың алдын алу мақсатында жүріп жатыр, - деп хабарлады облыстық полиция департаментінің баспасөз қызметі.
Шара барысында тәртіп сақшылары азаматтық қаруы бар 1373 тұрғынды тексеріп, лицензиялық-рұқсат беру ережелеріне қатысты 53 заңбұзушылық анықтаған. Оның ішінде заңсыз қару және оқ-дәрі сақтауға қатысты 8 материал сотқа жіберілген. Бұдан өзге, қару сақтауға және оны өзімен бірге алып жүруге құқық беретін 8 рұқсат құжаты жойылып отыр.
Мысалы, Қарасу ауданында өткен тексеріс барысында жергілікті тұрғындардың бірінен заң бойынша тіркелмеген 12 калибрлі "ИЖ-58" мылтығы тәркіленіп алынды. Сондай-ақ, Қарабалық ауданынының тұрғыны рұқсат құжатынсыз газ пистолетін сақтап келген.
Полицейлер рейд барысында 8 қару тәркілеп алған. Мұның сыртында, облыс тұрғындары 36 қаруды өз еркімен полицияға әкеліп тапсырған.
Қостанай облысы