Зеренді ауданының денсаулық сақтау саласының 36 қызметкерінің баспанасы жоқ. "Дипломмен – ауылға!" бағдарламасымен келген 16 маман үй кезегінде тұр, - деп жазады Egemen.kz
Бұл жай медицина қызметкерлерінің тұрақтап жұмыс істеуіне кері әсерін тигізіп тұр. Бүгінгі күні аудан бойынша 19 медицина қызметкері жетіспейді.
"Біз сияқты жас мамандардың алғашқы жарна төлейтін қаржысы және кепілге қоятын жылжымайтын мүлкі де жоқ. Сондықтан, тұрғын үй, ұзақ мерзімді бағдарламаларға қатыса алмаймыз. Амалсыздан үй жалдап тұрып жатырмыз", дейді дәрігер-педиатр Гауһар Шәріпова.
Баспана мәселесін шешу үшін наурыз айында 5 қабатты 40 пәтерлі тұрғын үй құрылысының жобалық-сметалық құжаты жасалған болатын. Сараптама оң қорытынды шығарған, аудан орталығынан жер телімі де бөлінді. Тек қаражаттың тапшылығынан қаңтарылып тұр. Осы мәселеге көңіл бөлген облыс әкімі Ермек Маржықпаев таяуда өзекті мәселе сессияда қаралып, қаржы бөлінетіндігін мәлімдеді. Әкімнің уәдесіне қарағанда, медицина қызметкерлеріне арналған көп қабатты тұрғын үй алдағы жылдың бірінші тоқсанында толық аяқталмақ. Уәде үдесінен табылса, аудандағы ахуал да біршама жақсарып қалатындығы сөзсіз.
Зеренді ауданы
Ақмола облысы