«Гермес» және «Рей» сынақтан сәтті өтті

Әбжіл қимылдап көмекке жү­гіруге машықтанған иттер қыл­мыс­керді ұстауға, өрттен немесе жер сілкінісінен кейін, өзге де апатты жағ­­дайлар салдары­нан қираған ғи­марат­тар мен үйлер үйінділері астынан адамдарды иіскеп тауып, дер кезінде құтқаруға атсалысады. Оларды уақы­тымен сынақтан өткізіп, жасы мен денсаулығын сынап-саралап отыру да маңызды екен.

Маңғыстау облысының Төтен­ше жағдайлар департаменті комис­сиялық құрамында Ақтау қаласының кинологиялық есебі сертификаттау­дан өткізілді. Оған «Гермес» және «Рей» есімді неміс овчаркалары бар жедел-құтқару жасағының екі кинологиялық есебі қатысты.

– Кинология қызметі төтенше жағдай кезінде барынша маңызды. Азаматтық қорғау органдарында зардап шеккен немесе жоғалған адамдарды іздеу және анықтау жөніндегі қызметті қызметтік иттермен кинологиялық есеп жүргізеді. Іздеу-құтқару операцияларына кинологиялық іздестіру тартылатын топтардың санын азайтуға, іздеу ауда­нын және адамды табу мүмкіндігін арттыруға мүмкіндік береді. Адам мен иттің өзара түсіністігі мен үйле­сімділігі маңызды, өйткені ол қиын­дықтағы адамды құтқаруға қызмет етеді. Бұл ретте жануарға міндет – адамдарды табу болса, кинологке міндет – өз жануарын қиын да күрделі, ал кейде төтенше жағдайларда жұмысқа үйрету, – дейді Маңғыстау облыстық Төтенше жағдайлар департаментінің баспасөз хатшысы Г.Ходжабекова.

Сертификаттау үш кезеңде өт­ті. Бірінші кезең – «Тыңдауды жә­не ептілікті тексеру», екінші ке­зең – «Табиғи ортада іздеу-құт­қа­ру жұ­мыс­тары», үшінші кезең – «Қи­ра­ған ғимараттар мен құрыл­ыс­тар­­дың­ үйінділері жағдайындағы іздестіру-құтқару жұмыстары». Барлық тапсырмалар нақты жағдайларға мей­лінше жақындатылып, ал ки­но­логия­лық есептердің жұмысын баға­лаудың негізгі өлшемдері іздес­тіру-құтқа­ру іс-әрекеттерін жүр­гізудің жыл­дам­дығы, сапасы мен қауіпсіздігі болды.

Сертификаттау нәтижелері бойынша аттестатталушылар, яғни «Гермес» және «Рей» сынақтан сәтті өтті.

Маңғыстау облысы