Бүгін Ливия астанасы Триполиде премьер-министр Али Зейданның ұрланғаны жөніндегі ақпар қате болып шықты. Бұл туралы ИТАР-ТАСС хабарлады.
Бұдан бұрын БАҚ өкілдері «Қаруланған белгісіз біреулер премьер-министрді штаб-пәтерінде отырған жерінен ұрлап әкетті» деген ақпар жариялаған болатын. Деректі дереу Ливия үкіметі де растады. Алайда, кейін анықталғанындай, мұның бәрі жергілікті ішкі істер министрлігінің жүргізген өзіндік шарасы болып шықты.
«Премьер-министрді ешкім ұрлаған жоқ», – деді Ливия ішкі істер министрлігі жанындағы қылмыспен күрес басқармасының өкілі Абдель Хаким аль-Булязи соңынан. Ол сондай-ақ үкімет басшысы Али Зейдан шынымен қамауға алынғанын айтты. Қамау басқарма бұйрығымен жүзеге асқан.
«Скай ньюс-Арабия» телеарнасының берген ақпарына қарағанда, Али Зейданға жемқорлық пен АҚШ арнайы жасағының болжам бойынша «Аль-Каида» тобы жетекшілерінің бірі Абу Анас аль-Либиді ұстауына қатысы бар деген айып тағылған. Осы айыптарға байланысты үкімет басшысы үстінен тергеу амалдары басталды.
Ливия үкіметі бұл оқиғаға байланысты шұғыл жиын өткізді.
Айдар Өрісбаев.