Облыстық полиция департаметінің қызметкерлері Мақат ауданында екі "Газель" көлігін тоқтатып, құжатсыз жанар-жағармай тиелгенін анықтады, - деп хабарлайды Egemen.kz.
Көліктерден жанар майды соруға және айдауға арналған құрылғылар да табылды.
"Полиция қызметкерлері 2 көліктің жүргізушілерінде (1984 және 1992 жылдары туған азаматтар) жалпы салмағы 6,6 тонна сұйықтыққа қатысты ешқандай құжаттар жоғын анықтады. Тәркіленген жанар-жағар майға сараптама тағайындалды", - деді Атырау облысы Полиция департаментінің бастығы полиция полковнигі Қамза Үмбетқалиев.
Қазір аталған дерекке қатысты ҚР Қылмыстық Кодексінің 197-бабымен (Мұнайдың және мұнай өнiмдерiнің шығарылу заңдылығын растайтын құжаттарсыз оларды тасымалдау, иемдену, өткiзу, сақтау) сотқа дейінгі тексеру жүргізіліп жатыр.