Өкіншке қарай, Алматы облысы тұрғындарының арасында қатерлі ісікке шалдығушылар қатары азаймай тұр. Аймақтағы онкологиялық ахуалды екі облыстық көпсалалы диспансер бақылайды. Оның бірі Талдықорған қаласында болса, екіншісі Алматы қаласында орналасқан. Мегаполистегі диспансер негізінен облыстың оңтүстік аймағындағы аудан тұрғындарына қызмет көрсетеді.
Қазір Алматы аймақтық көпсалалы клиникада 8976 пациент тіркеуде тұр. Жалпы, жыл сайын қатерлі ісікке шалдыққан 2 мыңға жуық адам есепке алынады. Ал биылғы 6 айда диспансерлік 879 адам тексеріліп, 709 тұрғыннан дерттің алғашқы белгілері анықталған.
– Жалпы онкологиялық ауруға шалдыққан науқастардың коронавирус инфекциясын жұқтыру қаупі жоғары. Сондықтан қауіпсіздік шараларын толық сақтай отырып, пациенттерді амбулаториялық және жоспарлы түрде қабылдауды тоқтатқан жоқпыз. Алайда жаңа тәртіппен жұмыс істеуге тура келді. Өйткені пациентке емді үздіксіз жүргізу қажет. Тіпті блок-бекеттер орнатылған кезде аудан орталығы мен ауылдарда тұратын пациенттерді клиникаға арнайы жедел жәрдем бригадалары тасымалдады. Соның нәтижесінде карантин уақытында 2593 адам толыққанды ем қабылдады, – дейді клиниканың бас директоры Саяхат Олжаев.
Осы аймақтық көпсалалы клиниканың мамандары пандемия кезінде де науқастарға амбулатолық қабылдау жүргізіп, диагностикалық зерттеу жасауды тоқтатқан жоқ. Сонымен қатар, аудандарда паллиативтік және мейірбикелік көмектің қолжетімділігін арттыру үшін мобильді бригадалар ұйымдастырылған. Мобильді бригаданың қызметкерлері карантин кезінде 4704 науқасқа көмек көрсеткен екен. Айтпақшы, облыста 165 жедел жәрдем бригадасы жұмыс істейді. Алты ай аралығында мобильді топ 300 мыңнан астам шақыруға қызмет көрсеткен. Яғни 2019 жылдың сәйкес мерзімімен салыстырғанда шақырулар саны 2 есеге өскен. Облыс әкімдігі тарапынан жедел жәрдем қызметкерлерінің жүктемесін жеңілдету көлік санын көбейту үшін қосымша қаржы бөлініп отыр. Осы мақсатта жыл соңына дейін қосымша 100 жедел жәрдем көлігі келмек. Атап айтқанда, 70 көлік лизингімен, 30 көлік жергілікті бюджет қаржысына сатып алынбақ.
Аты жаман аурудың күрт көбеюін онколог дәрігерлер бірнеше факторға сілтейді. Табиғи паталогияның асқынуы мен сыртқы жарақат салдарынан пайда болатын обыр түрлерін айтпағанда, қазір рак ісігінің асқынуына әлеуметтік жағдай жиі әсер ете бастапты. Адамның жүйкесіне түскен салмақ пен саламатты өмір салтының сақталмауы дерттің пайда болуына ғана емес, ем қонбайтын деңгейге дейін жетуіне себепші болып отыр екен. Қалай болғанда да онкологиялық ауруға шалдыққандардың қатары жыл сайын азаймай тұрғаны ақиқат. Өйткені Дүниежүзілік денсаулық сақтау ұйымының дерегі бойынша қазір ғаламшарда қатерлі ісік ауруына шалдыққан 20 миллионнан астам науқас бар. Оның ішінде аты жаман дерттің алғашқы белгісі жыл сайын 30 мың адамның бойынан анықталады. Ал Қазақстанда обыр диагнозымен 180 мыңнан астам тұрғын тіркеуге алынған.
Алматы облысы