АҚШ-тағы президенттік сайлауға демократиялық партия атынан Джо Байден қатысады. Бұл туралы Reuters агенттігі хабарлады.
Демократиялық партия съезінде Джо Байден ресми түрде бекітілді. Оның кандидатурасын қолдаушылардың арасында АҚШ-тың бұрынғы президенттері Билл Клинтон мен Джимми Картер, сондай-ақ АҚШ-тың экс-мемлекеттік хатшысы Колин Пауэлл бар.
Жиын барысында сөз сөйлеген Билл Клинтон Дональд Трампты сынға алды. «Қазіргідей жағдайда Ақ үй басқарушы орталық болуы тиіс еді. Керісінше, Ақ үй дауылды орталыққа айналды. Онда тек аласапыран бар. Бір нәрсе ешқашан өзгермейді: Д.Трамптың жауаптан қашуы мен кінәні басқаға аударуы», деді Б.Клинтон.
Ал Ақ үйдің қазіргі басшысы Дональд Трамп Демократиялық партияның өкілін қолдайтын республикашыларды сынады. Оның айтуынша, Байден – «солшыл партия қолындағы қуыршақ».
Қазіргі таңда мұхиттың арғы бетінде сайлау алды науқан қызған шақ. Осыған байланысты Д.Трамп Аризона штатына барды. Бір қызығы, осы штаттағы сауалдама нәтижесіне сүйенсек, Джо Байден оқ бойы озып келеді. Әйтсе де, кейінгі бірнеше аптада Трампты қолдайтындар саны артқан.