Атырауда карантин режімін бұзып, той жасағандар анықталды, деп хабарлайды Egemen.kz
Атырау полицейлері мобильдік топ құрамында жұма – жексенбі күндері аралығында карантин режіміне сай талаптарды орындамаған ондаған той иелерін анықтады.
Атап айтқанда, қаланың Мечников көшесіндегі үйлердің бірінде 30-40 адаммен той өткізілген. Студенттер көшесінде орналасқан мейрамханалардың бірінде өтіп жатқан тойда 80 адам, "Алмагул" ықшам ауданындағы мейрамханада тойланған туған күнде 50-60 адам, сондай-ақ Тайманов көшесіндегі мейрамханада 50-60 адам жиналған той анықталды.
"Жерұйық" ықшам ауданында орналасқан мейрамханалардың біріндегі караоке барда 15-20 адам анықталды. Сонымен қатар Лесхоз ықшам ауданындағы және Владимирский көшесінде орналасқан екі кальян – бар иелері де карантин режіміне қатысты тыйымдарға қарамай, жұмыс жасаған. Анықталған деректерге қатысты жинақталған құжаттар Атырау қаласының Тауарлар мен көрсетілетін қызметтердің сапасы мен қауіпсіздігін бақылау басқармасына жолданды.