Алматы қаласының әкімі «Алматы» ТА-ның Akimat Live бағдарламасындағы тікелей эфир барысында қалада қалыптасқан санитарлық-эпидемиялық ахуал туралы толығырақ айтып берді, деп хабарлайды Egemen.kz
Қалада 12 қазандағы жағдай бойынша 14 454 оқиға тіркелген, олардың ішінде симптомдары нақтыланғаны 8 685 және 5 769 симптомсыз оқиғалар. Науқастар көрсеткіші 723,93-ке тең.
Алматы әкімінің айтуынша, қалада жағдай тұрақты. Бірақ 6 қазанда аурудың біршама көтерілгені байқалды.
"Сондықтан қала тұрғындарын санитарлық-эпидемиялық қауіпсіздіктің қарапайым ережелеріне немқұрайды қарамауға, бетперде тағуға, әлеуметтік қашықтықты сақтауға, адамдар көп жиналатын орындардан аулақ болуға, санитарлық-гигиеналық ережелерді қатаң ұстануға шақырамын", деп атап өтті Б. Сағынтаев.
Қосымша шаралардың қатарында − Алматы қаласының халықаралық әуежайындағы мемлекеттік шекарада санитарлық-эпидемиялық бақылау күшейтілді. Қаланың мемлекеттік санитарлық дәрігерінің қаулысына сәйкес халықаралық рейстерден келетін жолаушыларда ҚВИ-дің жоқ екендігі туралы ПТР анықтамасы болуы тиіс. Олай болмаған жағдайда олар сараптама нәтижелері шыққанға дейін карантинге жатқызылады.
Ұшып кететін жолаушылардың КВИ-ге қатысты ПТР диагностикасын алу үшін лицензияланған іріктеу пункті ашық. Қалаға ПТР тестілеуінсіз келетін жолаушылар үшін уақытша тұратын қонақ үйлер дайын. Сонымен қатар, 26 мониторингтік топтар жұмыстарын қайта жандандырды, олардың құрамына аудандық әкімдіктердің, жергілікті полиция қызметінің қызметкерлері, "Атамекен" ҰКП өкілдері және аудандық тауарлар мен қызметтердің сапасы мен қауіпсіздігін бақылау басқармаларының мамандары енді. 8-10 қазан аралығында 383 рейдтік шаралар өткізілді, оның барысында 51 нысанның тәртіп бұзғандығы анықталды.
Бетперде режімін бұзғаны үшін 13 жеке тұлға ҚР Әкімшілік құқықтық Кодексінің 1 тармағының 425-бабы бойынша әкімшілік жауапкершілікке тартылып, оларға жалпы сомасы 541 710 теңге көлемінде айыппұл салынды. Бұдан өзге, қызметіне бұрын тыйым салынған объектілер анықталды. Олар белгіленген жұмыс режімін сақтамаған.
"Кәсіпкерлерді қаланың мемлекеттік бас санитарлық дәрігерінің талаптарын бұзбауға шақырамын. Сонда ғана біз ағымдағы карантиндік режимде жұмыс жасай алатын боламыз. Сіздер тұрақты табыс табасыздар және қалалықтарды жұмыспен қамтамасыз етесіздер. Барлығы сіздерге байланысты", деді қала әкімі Б. Сағынтаев бизнес-қоғамдастық өкілдеріне.
Бүгінгі күні қолданыстағы карантиндік шектеулер сақталады. Егер санитарлық-эпидемиялық ахуал нашарлайтын болса, онда қосымша шектеу шараларын енгізу мүмкіндігі қарастырылатын болады.