Қазіргі қазақ поэзиясындағы өзіндік орны танылған ақын Серік Ақсұңқарұлы алпыстың белесінен аттады. Мерейжас алдында аймақтағы оқу орындарында өткізілген кездесулер жолын қуған таланттар есінде қалды. Облыс әкімі Серік Ахметов арнайы қабылдап, құрмет көрсетті.
Ақсұңқарұлы арынды шығармашылығының сүйермендері Сәкен Сейфуллин атындағы облыстық драма театрындағы жүздесуде алдарына шыққан ақынның өз аузынан ортаға құйылған өлең-жырларын құлақ түре тыңдап, поэзия ләззатына бөленді. Алматыдан, Астанадан қуанышын бөлісуге келген қаламдастар Төлен Әбдік, Нұрмахан Оразбек, Темірхан Медетбек, Жұмабай Шаштайұлы, Ұлықбек Есдәулет, Ғалым Жайлыбай сынды ұлттық әдебиеттің көрнекті тұлғалары қарағандылықтардың Серік Ақсұңқарұлын лайықты мақтаныш тұта алатындықтарын атады.
Айқын НЕСІПБАЙ, Қарағанды.