АҚШ билігі Иранға және елдегі мұнай-газ саласына қатысты компанияларға жаңа санкция салды. «Қара тізімге» іліккендер қатарында Иранның мұнай министрлігі де бар. Рейтер агенттігінің хабарлауынша, бұл қадам Тегеранға қысым көрсету мақсатында жасалып отыр.
АҚШ-тың Қазынашылық департаменті Иранның мұнай-газ саласы Құдс күштерін қаржыландырып отырғанын алға тартады. Осылайша, Тегеран билігі аймақтағы тұрақтылыққа кедергі келтіріп отыр.
Сондай-ақ «қара тізімге» енгендер қатарында Иранның Ұлттық мұнай компаниясы мен Ұлттық танкер компаниясы да бар. Вашингтон билігі аталған компаниялар мен оларға қатысы бар тұлғалардың АҚШ-тағы шоттарын бұғаттап, америкалықтардың олармен сауда жасауына тыйым салды.
Иран мен АҚШ арасы Дональд Трамп Ақүй тізгінін ұстағалы қайта бұзылған-ды. Мәселен, 2018 жылы АҚШ тарапы Иранмен жасалған ядролық қару жөніндегі келісімнен шықты. Биылғы қаңтарда осы елдің танымал генералдарын атып өлтірді.