Осыдан 3 жыл бұрын Қарағанды облысындағы Шахан кентінде бес қабатты үйдің жертөлесіндегі жылыту қазандығы жарылып, апат салдарынан тоғыз адам көз жұмған болатын.
Арада үш жыл өтсе де шахандықтар әлі күнге дейін жылуға жарымай отыр. Әлбетте, жергілікті билік қол қусырып қарап отыр деуден аулақпыз. Бұл бағытта алға біршама жылжу бар. Мысалы, қазір Шахан кентінде орталықтандырылған жылу қазандығының құрылысы қарқынды жүріп жатыр. Мұнда құрамы 50 жұмысшыдан тұратын бригада күн-түн демей жұмыс істеуде. «Өңірлерді дамыту» бағдарламасы бойынша басталған қазандық құрылысын келесі жылы аяқтап, пайдалануға беру жоспарланған.
Жылу қазандығы құрылысымен айналысушы мердігер компаниясының басшысы Әмір Дәулеталиев нысанның заманауи, энергиялық тиімділігі жоғары технология бойынша салынып жатқанын айтты. Яғни бұл жоба көмірдің кез келген түрін пайдалануға мүмкіндік береді.
– Жаңа нысанда үш қазандық бар. Қазір біз ғимараттың төбесін жабуды аяқтап қалдық. Алдағы аптада қажетті жабдықтарды орната бастаймыз. Келесі жылы жылу трассасын тартып, нысанның айналасын абаттандыруды қолға аламыз, – дейді құрылыс компаниясының бас директоры.
Маманның айтуынша, қазандықтың қуаты бүкіл ауылға 35 гигакалория беруге қауқарлы болады. Тіпті болашақта кентте жаңа үйлер салынса, оларды да жылумен толыққанды қамтамасыз етуге мүмкіндік туады.
Аталған кентте жылу мәселесінен басқа да проблемалар бастан асады. Мәселен, 8 мыңнан аса тұрғыны бар елді мекенде қаңырап бос тұрған ғимараттар аз емес. Егер істің қиюын табар ұйымдастырушы адам болса, мұның бәрін іске жаратушы еді. «Бос тұрған ғимараттарды жөндеп, оларға балабақшалар мен білім беру мекемелерін орналастырса» деген тілек айтады жергілікті тұрғындар. Елді мекендегі кәріз жүйелері де ескірген, айырбастауды қажет етеді.
Кентте ауыл тұрғындары үшін қыста спортпен айналысатын нысан атымен жоқ. Мұның өзі ауыл жастарының кешке таман бос сенделіп жүруіне әкеп соқтырады. Қазір жергілікті полиция бөлімінде басшы да табылмай тұр. Бұл жағдай қылмыс деңгейінің өсуіне тікелей әсер етуі мүмкін.
Сол секілді Шахандағы басты проблеманың бірі – жеке сектордағы интернеттің әлсіздігі. Осының салдарынан балалар онлайн режіміндегі оқу барысында қиындықтарға тап болып жүр.
Бүгінде Шахан кентінің мәселесі – облыс басшылығының тікелей назарында. Алдағы уақытта елді мекеннің барлық проблемасы ескеріліп, оларды шешудің тиімді жолдары қарастырылмақ.
Қарағанды облысы