Жаз айларында қос өкпесі қусырыла тарылып, бір жұтым ауаға зар болған науқастардың ауыр жағдайы ұмытылған секілді. Олай деуімізге себеп – тұрғындардың карантин шараларын сақтамауы, тіпті мейрамханаларда отбасылық басқосуларды дүрілдетіп өткізу тыйылар емес. Мәселен, өңірдегі 110 мобильдік топ мүшелері өткен жұма мен сенбі-жексенбіде сауда орталықтары мен кафе-мейрамханаларда, сондай-ақ азық-түлік дүкендерінде шектеу шараларының бұзылғанын анықтады. Әсіресе тұрғындар үйлену, мерейтойларды өткізуден бас тартпай отыр.
– Тексерушілер «Ақжол», Castle, Sultan Hall мейрамханаларында үйлену және мерейтойлар өткізу деректерін тіркеді. Ал «Мұрагер» сауда үйінде маска тағу режімі сақталмайды. Мұнда термометрия жоқ болып шықты. Сәтпаев көшесіндегі «Фудзи» суши барында қызметкерлер маскасыз және қолғапсыз қызмет көрсетеді. «Бармаглот» барында 30-дан аса келуші сағат 22:00-ден кейін де болған. Жұмыскер кентіндегі «Гүлдияс» дүкені сағат 23:00-ден кейін қызмет көрсетіп, шектеу шаралары режімін бұзған, – деп хабарлады өңірлік коммуникациялар қызметі.
Тұрғындардың мейрамханаларда той өткізуіне кім мүдделі дейсіз? Алдымен бұған мейрамханасы бар кәсіпкерлер мүдделілік танытары даусыз. Мұны олар жақында ашық мәлім етті. Мейрамхана бизнесімен айналысатын бір топ кәсіпкер облыстық әкімдіктің алдына жиналып, өздерінің талабын жария етті. Бұл қандай талап?
Нақтысын айтқанда, кәсіпкерлер біріншіден, санитарлық талаптарды сақтай отырып, 50 адамға дейін қатысатын той жасауға рұқсат беруді сұрайды. Екіншіден, тойхананың коммуналдық төлемін төлеуге әкімдіктің көмек көрсеткенін қалайды. Тойхана иелерімен кездескен облыс әкімінің орынбасары Ержан Әбілхановтың айтуынша, қазір көптеген елде коронавирустың екінші толқыны өтіп жатыр. Ал мемлекет пен облыстық әкімдік тарапынан отандық бизнесті қолдауға көңіл бөлінуде.
– Алайда әр азаматтың денсаулығы мен қауіпсіздігі маңызды екенін ұмытпау керек. Қауіпті індеттің қатері ескеріліп, өңірдегі шағын және орта кәсіпкерлік нысандары үшін біртіндеп жеңілдету шаралары қолға алынуда. Тойханалар мен банкет залдарына 50 адамға дейін қатысатын шараларды өткізуге рұқсат беру мәселесі қарастырылып жатыр, – деді Ержан Әбілханов.
Ал облыстың бас мемлекеттік санитарлық дәрігерінің уақытша міндетін атқарушы Амантай Жұмағалиевтың айтуынша, қауіпті індетті жұқтыру дерегі әлі де тіркеліп жатқанда адамдар шоғырланатын мұндай той-томалақ өткізудің қаупі басым болады. Сол себептен қауіпті індеттің таралу мүмкіндігі секілді мәселенің екінші жағына көңіл аудару керек.
– Кездесуде айтылған мәселенің бәрін хаттамаға түсірдік. Соған сәйкес мәселені оң шешу жолдарын қарастырамыз. Әрине, бұл – бір күнде шешілетін мәселе емес. Бұрын тойхана иелері ғимараттың жарығына төлем төлеп отырса, енді жылыту маусымы басталды. Олар төлемдері көбейгенін айтып отыр. Сондықтан кәсіпкерлердің ұсынысын ескеріп, карантин кезіндегі талаптарды сақтай отырып, екі жаққа да тиімді тұсын қарастырамыз, – дейді облыстық кәсіпкерлік және индустриялық-инновациялық даму басқармасы басшысының міндетін уақытша атқарушы Әбдуахит Әбішев.
Рас, бірнеше айлап, кәсіпсіз, табыссыз отыру оңай емес. Дегенмен, мейрамханаға бірнеше адамды топырлатып кіргізіп, той өткізуден түскен табыс табу қымбат па? Әлде айналаңдағы адамдардың, ағайын-туыстың денсаулығы қымбат па? Тегінде жақыныңа жанашыр болуды қалай түсінесіз?
Атырау облысы