Қазақстанда электр энергетикасы саласында маневрлік қуат көздерін салуды ынталандыратын заң жобасы қарастырылмақ. Бұл туралы Энергетика министрі Нұрлан Ноғаев Алматы облысына жұмыс сапары барысында айтты.
Министр Қапшағай су қоймасы ауданындағы күн және гидроэлектр стансасының жұмысымен танысып, Шелек ауылындағы жел энергетикалық стансасының құрылыс орнында Алматы мен Алматы облысын энергиямен жабдықтау туралы мәселелерді талқылады.
Н.Ноғаев Үкімет электр энергетикасы секторында маневрлік қуат кешендерінің құрылысын ынталандыруға ниетті екенін айтты.
Бүгінде елімізде электр қуатының профициті маневрлік қуаттардың тапшылығымен сәйкес келіп тұр. Мәселен, тәулік ішінде электр энергиясын тұтыну деңгейі біркелкі емес. Атап айтқанда кешкі уақыттарда жоғарылап, түнде төмендеген бойда электр стансалары жедел ауыспалы жұмысты қажет етеді. Сол себепті жұмыс істеп тұрған электр стансаларының қазіргі реттеу мүмкіндіктері жеткіліксіз болған соң, жүйелік операторға Ресейдің реттеуші энергия жүйесіне сүйенуге тура келеді.
Маневрлік генерацияны құру жөніндегі жобаларды анықтау аукционды іріктеуді қолдану арқылы жүзеге асырылмақ. Ведомство басшысының айтуынша, бұл осындай көздердің құрылысына серпін беріп, тұтынушыларға неғұрлым тиімді жобаларды таңдауға жол ашады. Аталған шаралар Қазақстандағы Жаңғырмалы энергия көздерінің инвестициялық тартымдылығын арттыруға мүмкіндік беріп, отандық энергетикалық жүйеге қолайлы әсер етеді деп болжануда.