Маңғыстау облыстық ауруханасында аймақ тарихында алғаш рет жамбастағы ұршық буынын ауыстыру отасы ойдағыдай өтті. Республикалық Травматология және ортопедия институтының белгілі мамандарымен бірге, маңғыстаулық мамандар бір күнде үш науқасқа жаңа технологиямен жасалған ұршық буынын ауыстырды. Күрделі отаны аталмыш институттың бөлімше меңгерушісі, медицина ғылымдарының кандидаты Алексей Белокобылов, облыстық аурухананың травматология бөлімінің меңгерушісі Аманқос Шаухымбердиев бастаған мамандар ойдағыдай өткізді. Сәтті өткен ота нәтижесінде, үш науқас та өз аяқтарына тұрып, үйлеріне қайтқалы отыр.
Осы ретте облыстық әкімдіктің қолдауымен жақында ғана жаңа технологиямен жасалған жасанды ұршық буындарын алу үшін 43 миллион теңге қаражат бөлінгендігін осы бір қауіпті дертке орай кезекте тұрғандарға жасалған игілікті іс-шара деуге әбден болады. Ал алғаш рет жасалған үш ота “Бірыңғай ұлттық денсаулық сақтау жүйесінің” аясында қолға алынып, жүзеге асты.
Жоламан БОШАЛАҚ.
Ақтау.