Көрнекті жазушы Дулат Исабековтің пьесасы негізінде түсірілген «Әпке» телесериалының алғашқы бөлімдері «Қазақстан» ұлттық телеарнасында жүріп жатыр. Жуырда осы телехикаяның тұсаукесер рәсіміне орай брифинг ұйымдастырылды.
Көрнекті жазушы Дулат Исабековтің пьесасы негізінде түсірілген «Әпке» телесериалының алғашқы бөлімдері «Қазақстан» ұлттық телеарнасында жүріп жатыр. Жуырда осы телехикаяның тұсаукесер рәсіміне орай брифинг ұйымдастырылды.
«Әпке» өткен ғасырдың жетпісінші жылдары дүниеге келген шығарма. Содан бері заман өзгерді, ұрпақ ауысты. Құндылықтарға деген түрлі көзқарастар пайда болды. Руханиятты нарыққа бейімдеу туралы ойлар да айтыла бастады. Бірақ, адамзатпен бірге жасасып келе жатқан негізгі адамгершілік заңдары қоғамдық өзгерістерге ешқашан да тәуелді болмақ емес. Өйткені, ол тұтас халықтың сұранысына ие, күнделікті тұтынуға қажетті «шикізат». Біз үшін тұтас халықтың сұранысына лайық сондай шығарманың бірі – «Әпке». Өз тағдырынан бауырларының қамын биік қойған абзал жанның маңайында өрбитін оқиға, яғни, «Әпке» пьесасы екі сағатқа лайықталған. Ол 36 жылдан бері М.Әуезов атындағы академиялық драма театры мен басқа да облыстық театрларда қойылып келеді. Ал, соның негізінде жасалған «Әпке» – 16 сериядан тұратын, жаңа заманға лайықталған кинотуынды.
Жазушы Дулат Исабеков өз шығармасының телехикаяға арналып, қалың көрерменге жол тартқаны үшін алдымен «Қазақстан» ұлттық арнасының басшылығына ризашылығын білдірді. Фильм ұлттық арнаның тапсырысымен, Нұргелді Сәдіғұлов, Мұрат Бидосов, Батырхан Сазаханов, Жәмит Көшербаев сынды режиссер-сценаристердің, фильмге қатысы бар тағы басқа да жандардың еңбектерінің арқасында дүниеге келді. «Қазақта көш жүре түзеледі дейтін жақсы сөз бар. Өйткені, біз сериал түсіруді енді ғана қолға алып жатырмыз. Сол үшін кемшіліктер жоқ емес. «Әпкеге» қатысты алғанда оның бағасын кейіннен киносыншылар айта жатар. Мен бүгін бұл туындымның шеруі тоқтамағанына ризашылығымды білдіргім келеді. Сахнада алғаш әпке рөлін сомдаған Фарида Шәріпова еді. Қазір арамызда жоқ. Одан кейін әпке боп сахнаға шыққандардың да алды әже боп кетті. Міне, енді жаңа заманның кинодағы «әпкесімен» кездесейін деп отырмыз. Жалпы, туынды бір жанрдан екінші жанрға өткенде мазмұндық, көркемдік жағынан бір нәрселерді жоғалтып, екінші бір нәрселерді тауып жатады. Оның үстіне телехикая басқа заманда түсіріліп отыр. Киноны алдын ала көргенім жоқ. Мен де ел қатарлы көріп шығатын боламын», – деді Дулат Исабеков.
«Қазақстан» РТРК» басқарма төрайымының орынбасары Қайнар Олжай ұлттық арнада бір ай бұрын түрік пен корейдің сериалдары тоқтағанын, олардың орнына бұдан былай отандық өнімдер ұсынылатынын жеткізді. Қазақ драматургиясының көшін бастап келе жатқан белгілі қаламгердің «Әпке» туындысы халыққа ұсынылып отырған алғашқы сүбелі дүние екенін, бұны түсіруге кино және телевизия саласында белгілі бір жетістікке жеткен мамандар тартылғанын баяндады.
Айта кетейік, «Әпке» фильміне Рита Күмісқалиева, Қуаныш Керімқұлов, Дарын Шыныбек, Айдана Асқар, Әли Тұрсынханов, Бақытжан Әлпейісов, Шынар Асқарова, Ерлан Біләл, Айзада Сатыбалдиева, Жалғас Толғанбай және тағы басқа актерлер мен актрисалар түскен.
Айгүл СЕЙІЛОВА,
«Егемен Қазақстан».