Ортақ мүдде орайындағы кездесу

Қазақстан Республи­ка­сының Қорғаныс министрі Әділбек Жақсыбеков Қазақстанға ресми сапармен келген Түрік Республикасының Ұлттық қорғаныс министрі Исмет Йылмазбен кездесті.

Қазақстан Республи­ка­сының Қорғаныс министрі Әділбек Жақсыбеков Қазақстанға ресми сапармен келген Түрік Республикасының Ұлттық қорғаныс министрі Исмет Йылмазбен кездесті.

– Қазақстан мен Түркия арасындағы ынтымақтастық қазіргі таңда бауырлас ел­де­ріміз басшыларының ар­қасында белсенді түрде дамып келеді. Түркия – Қазақстанның тәуелсіздігін таныған тұңғыш мемлекет. Алғашқылардың бірі болып, Қарулы Күштерді дамытудың әртүрлі аспектілері бойынша өз тәжірибелерін бөлісуге әзірлігін білдірген болатын, деп атап өтті Ә.Жақ­сыбеков.

Кәсібилендіру бүгінде Қазақстан әскері үшін өзекті бағыттардың бірі болып табылады. Осы бағытта Қазақстан әскери ведомствосы түрік әскерінің іріктеу жүйесін дамыту, шақыру, әскери персоналды есепке алу мен бағалау тәжірибесін зерделеу­ге мүдделі.

Әскери білім мен ғы­лым қазақ-түрік әскери ынты­мақ­тастығының ма­ңызды бағыты болып табылады. Қазақстан Қорғаныс министрлігі Түр­кия әскери оқу орындарында қазақстандық әскери қыз­метшілер үшін оқыту квота­сын арттыруға, сондай-ақ Қазақстанның Ұлттық қор­ғаныс университетінде дәріс оқу үшін профессорлық-оқы­тушылар құрамын шақыруға мүдделі. «Еліміздің әскери мекемесін жетілдірудің ма­ңыз­ды бөлігі білікті және дайын­далған мамандар болып та­былады», – деп атап өтті Ә.Жақ­сыбеков осы орайда.

Тараптар осыған дейін Анкарада өткен кездесу екі­жақты өзара іс-қимылдың бағыттарын нақтылап, бола­шақтағы басымдықтарды неғұрлым айқындап бергенін атап өтті.

Ә.Жақсыбеков пен И.Йыл­маз екіжақты ын­ты­­мақтастық, оның ішінде әс­ке­ри-техникалық өзара іс-қимыл саласындағы бір­қатар өзекті мәселелерді талқылады. Одан кейін Қазақ­стан мен Түркия қорғаныс ведомстволарының басшылары электронды-оптикалық құрылғылар өндіретін «Қа­зақстан АСЕЛСАН инжиниринг» қазақ-түрік бірлескен кәсіпорнының ашылу рәсіміне қатысты. Қазақстандық мамандар осы зауыттың өнімдерін әртараптандыру мүмкіндігін қарастыруда.

Ә.Жақсыбеков И.Йыл­мазға Қазақ­станның қор­ғаныс өнеркәсібі саласын дамытуға қосқан үлесі үшін алғыс біл­діріп, Түркия Қазақстан үшін халықаралық әскери және әскери-техникалық ын­тымақтастықта сенімді әріп­тестер қатарында қала беретінін жеткізді.

«Егемен-ақпарат».