Нұр-Сұлтанда қалалық парктер жасыл артерияға және велосипедшілер мен жаяу жүргіншілер жолы біріктіріледі. Су бетіндегі қалқымалы жағалау, скейт-парк, көше кинотеатры, жаңа қалалық жағажай, спорт павильондары және тағы басқалары салынады, деп хабарлайды Egemen.kz
Парктер мүмкіндігі шектеулі жандардың мүдделерін ескере отырып салынатын болады. Жобада Есіл өзенінің бойында ұзындығы 16 километрге жуық жаяу жүргіншілер аймағы мен веложол салу көзделген, парктердің жалпы ауданы – 360 гектар. Елорданы одан әрі дамыту «Нұр-Сұлтан – жайлы қала» мастер-жоспарына енгізілген.
Елорда әкімі Алтай Көлгіновпен кездесу барысында спорт федерацияларының басшылары саябақтарда спортшылар мен басқа да спортпен шұғылданатын адамдар киім ауыстырып, спорт жабдықтары мен заттарын салатын орындардың болмауы туралы мәселені көтерді. Осылайша, саябақтарда спорт павильондарын ашу жоспарлануда. Алдымен Триатлон-паркке салынбақ. Онда шешінетін бөлмелер, душ және жаттықтырушылар мектебі болады.
Нұр-Сұлтан әкімдігі 2020 жылы пандемияға қарамастан қаланы абаттандыру бойынша ауқымды жұмыстар атқарды. Жалпы алғанда 760 мың шаршы метрден астам аула абаттандырылды. Бұл 150-ден астам аула мен 60 қоғамдық кеңістік (саябақтар, скверлер, бульварлар). Қаланың ескі бөлігіне баса назар аударылды. Қала тұрғындары үшін Президенттің тапсырмасы бойынша спортпен шұғылдану үшін жағдайлар жасалуда. Мемлекет басшысы бұқаралық спортты дамытудың маңыздылығын айрықша атап өткен еді.
Елорданың жас тұрғындарының өтініші бойынша алғаш рет Л.Н. Гумилев атындағы ЕҰУ жанында көпірдің астында орналасқан скейт-алаң ашылды. Сондай-ақ, стритбол алаңы, үстел теннисі алаңы және workout аймағы бар. Биыл оқушылар Сарайының жанында тағы бір скейт-парк ашылады.
Президенттік саябақта қалқымалы тақтай жағалауы орнатылады. Бұл елорда тұрғындары мен қонақтары үшін тартымды орындарының бірі болады.
Ақбұлақ өзенінің жағалауы абаттандырылады, онда жаңа қалалық жағажай салынады.
«Біз қала тұрғындарының қажеттіліктерін ескереміз. Тұрғындар жаяу серуендеуді, жалпы спортты жақсы көрді. Мысалы, өткен жазда алғаш рет ашылған жаңа сахна арт-кеңістігін алайық. Қазір олар қала тұрғындарының сүйікті орындарының біріне айналды. Салауатты өмір салты идеясын насихаттау өте маңызды. Біріккен парктер инклюзивті болады, яғни халықтың барлық топтарының қажеттіліктері назарға алынады», - деп атап өтті Урбанистика орталығының басшысы Елнар Базыкен.
Саябақ аумағы қала секілді ауқымды көгалдандырылатын болады. Елбасы сұхбаттарының бірінде атап өткендей, қаланың бас жоспары ғимараттардың, жасыл желектер мен орманның симбиозы ретінде жасалған. Осы тақырыпты ары қарай да жалғастыру қажет. «Үйлер мен ғимараттардың айналасында ағаш отырғызу қажет, бұл орындар тақыр жер емес, жасыл болуы керек. Бұл қазақстандық қатал климат жағдайында өте маңызды».