Кеше Парламент Мәжілісінің Төрағасы Орал Мұхамеджановтың жетекшілік етуімен палата бюросының отырысы өтті.
Бюро шешіміне сәйкес сәрсенбі күнгі жалпы отырыста “Мәдениет туралы” Заңға ұсынылған толықтырулар бойынша Мәжіліс пен Сенат арасындағы келіспеушіліктерді еңсеру жөніндегі келісім комиссиясының ұсыныстары тыңдалатын болды. Депутаттардың талқысына кейбір заңнамалық актілерге еліміздің электрондық үкіметін дамыту мәселелерін қамтыған заң жобасы бірінші оқылымда ұсынылды.
Мәжілістің жалпы отырысының күн тәртібіне “Таңбаларды халықаралық тіркеу туралы Мадрид келісіміне хаттаманы ратификациялау туралы” заң жобасы енгізілетін болды. Сонымен қатар, “Тұрғын үй қатынастары туралы” Заңға өзгерістер мен толықтырулар енгізу туралы” заң жобасын талқыға салу көзделіп отыр.
“Егемен-ақпарат”.