Тауда Алматы қаласында ұйымдастырылған «Мен де жұлдыз боламын!» атты республикалық байқауда бақ сынаған қарағандылық жас әнші Асылайым Болатқызы жүлделі екінші орын алып, Түркияда өтетін халықаралық конкурстың жолдамасына ие болады.
Қарағандыдағы кеншілер мәдениет сарайы жанындағы «Шабыт» эстрадалық вокал үйірмесінің мүшесі Асылайым үшін бұл алғашқы жетістік емес. Өнерлі балдырған бұған дейін де республикалық және халықаралық конкурстарға қатысып, бірнеше мәрте лауреат атанған.
Алматыда өткен байқауда қарағандылық әнші қыз Шөмішбай Сариевтің сөзіне жазылған Кеңес Дүйсекеевтің «Сәлем саған, туған ел» әнін орындап, қазылар алқасының ықыласына бөленді.
Асылайым кеншілер астанасындағы №77 орта мектептің 6-сыныбында оқиды. «Шабыт» эстрадалық вокал үйірмесіне екі жылдан бері қатысып жүр.
Сонымен бірге, Асылайым Болатқызының ұстазы, аталған үйірменің жетекшісі Ерболат Маханбет аталған конкурстың жабылу салтанатында қазақ өнерінің дамуына үлес қосқаны және үздік шәкірт даярлағаны үшін Алғыс хатпен марапатталды.
Ал Түркияда өтетін халықаралық байқау туралы айта кетсек, ол конкурс маусым айында ұйымдастырылуы мүмкін. «Байқаудың нақты мерзімі және оның талаптары туралы ұйымдастырушылар жақын арада өздері хабарлауы тиіс», дейді Ерболат Маханбет.
ҚАРАҒАНДЫ