Сол күні залға жиылған жұртшылық өнер кешіне ғана емес, адамдардың бір-біріне жан жылуын шашып, қайырымдылық нұрын сыйлайтын адамгершілік кешіне куә болды. Ол – кәсіби әншілермен бірге мемлекеттік қызметкерлердің 80-ші жылдардағы әндерді шырқаған қайырымдылық шарасы болатын.
Сол күні залға жиылған жұртшылық өнер кешіне ғана емес, адамдардың бір-біріне жан жылуын шашып, қайырымдылық нұрын сыйлайтын адамгершілік кешіне куә болды. Ол – кәсіби әншілермен бірге мемлекеттік қызметкерлердің 80-ші жылдардағы әндерді шырқаған қайырымдылық шарасы болатын.
Тағдырдың қиындығын ешкім де қалап алмайды, ал тап болған соң көтеруге мәжбүрлік пайда болады. Небәрі 37 жастағы Эльмира Сапарова да осы қиындықпен бетпе-бет келген жан. Автокөлік қаққан соң сал болып төсекке таңылған жас тағдырды үш жылдан бері жары бағып-күтуде. Жарына деген жанашырлықпен және екі ұлдың ас-суын дайындау үшін отағасының ЖШС-дегі жұмысынан қол үзуін бір жағы қайсарлық десек, екінші жағынан оның материалдық жетіспеушілікке әкеліп тірері айтпаса да түсінікті. Қазір ай сайын 50 мың теңгеге үй жалдап жүрген отбасында ми жарақаты, ми сүйегінің жабық сынығы, ауыр дәрежедегі сынық диагнозымен мүгедек атанған Эльмираны емдетуге қаржы жоқ. Көптің көмегімен Ташкент қаласына барып келгендеріне де үш айға жуықтаған, ота жасатуға шақырғанымен, қаржының жоқтығы қолбайлау.
Жергілікті «Қазақстан-Ақтау» телеарнасының «Үміт сәулесі» бағдарламасы негізінде назарға ұсынылған бұл әулетке жол үстінде ойламаған жерде мүгедек атанған Эльмираның шетелде емделіп, ота жасатып, өз аяғынан басуына жәрдем беру үшін Маңғыстау облыстық мәдениет басқармасы көмек қолын созды. Ретро кеште 20 ауыл, қала әкімдері, мемлекеттік мекемелер басшылары 20 кәсіби әншілермен бірлесе өнер көрсетіп, ән шырқады. «Әу демейтін қазақ жоқ» деген сөз бар, бірақ әу дегеннің бәрі әнші емес екені анық. Қызмет арасынан уақыт тауып, алыс ауылдардан арнайы Ақтауға келіп шенеуніктердің ән салуы тәуелсіз ел азаматтарының бір-біріне деген қамқорлығы, бір-бірін қолтықтан демеуі деп түсіндік. Ел тәуелсіздігінің 22 жылдығы аясында, жаңа жыл қарсаңында емделу үшін қаржыны қайдан табамын деп қиналған Эльмира үшін алғаш ұйымдастырылып отырған ізгі шара келешекте де жалғасын таппақ.
– Қарлығаштың қанатымен су сепкеніндей болса да, жетпесті жалғап, тарыққанды таяп, азаматтық көрсеткен ұйымдастырушыларға рахмет айтамыз. Жиналған қаржы отаға жетіп қалар деп отырмыз, енді Ташкентке жол жүретін боламыз, – дейді отағасы Елдос.
Гүлайым ШЫНТЕМІРҚЫЗЫ,
«Егемен Қазақстан».
Маңғыстау облысы.