Желаяқтар Өскеменде сайысты

Биылғы ел чемпионаты то­сын жағдайларға, күт­пеген же­ңістерге және жаңа орна­тыл­ған рекордтарға толы болды. Мә­се­лен, медаль жиынтығы бойынша бірнеше жылдан бері алдына жан салмай, жалпыкомандалық көр­сеткіште бірінші орынды еш­кімге бермей келе жат­қан шы­ғысқазақстандық спорт­шылар биыл биік белес­тен көріне алған жоқ. Есесіне қа­рағандылық же­ңілатлеттердің қарқыны қатты болды. Үш күнде 10 алтын, 7 кү­міс және 8 қола жүл­де жеңіп алған кеншілер қа­ла­сының спортшы­лары Кенді Алтай өкілдерін басып озды.

Сондай-ақ былтырғы чемпионатта 60 метрге кедергілер ар­қы­лы жүгіруде 30 жылға жуық уа­қыттан бері жаңармаған Андрей Гу­товтың рекордын бұз­ған Давид Ефре­мов биыл тағы да рекорд орнатып, өзінің былтырғы нәтижесіне түзету енгізді. Өткен жылы аталған қашықтықты 7,67 секундта жүгіріп өткен Ефремов, биыл бұл межені 7,65 секундта бағындырды.

Өскемендегі жарыстың бағ­дарламасына аздаған өзгеріс енгізілгенін де байқадық. Ұйым­дастырушылар биылғы жарысқа ардагерлер арасында 4х200 метрге аралас эстафеталық жүгіру сайысын қосқан екен. Бұл сында Шығыс Қазақстан, Қарағанды және Алматы облыстарынан келген 3 құрама команда қатысты.

Ел біріншілігінің қоры­тын­дысы бойынша, ерлер арасында 60 және 200 метрге жүгіруде қарағандылық Виталий Земс, 400 метрге жарыста Азия чем­пио­натының қола жүлдегері Ми­хаил Литвин (СҚО), 800 және 1 500 метрге жүгіруде шымкенттік Әбділәзіз Әбдіқауымов,  3000 метр қашықтықта жамбылдық Дмитрий Иванчуков топ жарса, қыздар арасында павлодарлық Ольга Сафронова (60 м), алма­тылық Виктория Ан (Зябкина) (200 м), жамбылдық Светлана Голендова (400 м), қостанайлық Ека­терина Грицай (800 м), шы­ғыс­қазақстандық Арина Гла­ды­шева (1500 м) және Алматы облысының өкілі Ақбаян Нұр­ма­мет (3000 м) Қазақстан чемпио­ны атанды.

Ұпай көрсеткіші жалпы­ко­мандалық есеп бо­йынша да бірінші орынды Қа­рағанды облысының құрамасы (24 547 ұпай) қанжығаларына байлады. Екінші орынды Шығыс Қазақстан облысы (23 132 ұпай) иеленсе, үздік үштікті Алматы қа­ласы (16 694) түйіндеді.