ТҮРКІ ТІЛДЕC МЕМЛЕКЕТТЕР

ҮШІН АСА МАҢЫЗДЫ ЖЫЛ Парламент Мәжілісінің депу­таты, заң ғылымдарының док­торы, профессор Нұрлан Әбдіров Түрік Республикасының астана­сына парламенттік сапар жасап келді. Ол Анкара қала­сында өткен “Түркі дүниесі қарым-қатынас­тарындағы жаңа қадам: Нахчы­ван Рухы” симпозиумына қа­тысты. 2009 жылы Әзірбайжанның Нахчыван қаласында түркі тілдес мемлекеттер басшылары тарапынан қол қойылған құжат бүгінде тарихи мәнге ие болуда. Түркі әлемі үшін тарихи маңызы ерекше бұл келісімнің әсері мен ықпалы жыл өткен сайын арта түседі деп сене­мін. Симпозиумның осы келісімге арналып отыруы да сөзіміздің айғағы. Қазақстан тәуелсіздік алған күннен бері түркі әлемі мен Еура­зияда ынтымақтастық пен ықпал­дасудың белсенді бастамашысы болып келеді. Мұнда Қазақстан Президенті Нұрсұлтан Назарбаев­тың еңбегі ерекше зор. Қазақстан Президенті Н.На­зарбаев 2006 жылы Анталия қала­сында өткен Түркі тілдес мем­лекеттер басшыларының кезекті саммитінде Түркі тілдес  мемлекет­тердің Парламенттік Ассамблеясы мен Түркі әлемі Ақсақалдар  алқа­сын құру туралы бастама көтерді. Осы құрылымдар мен Нахчыванда тағы да Елбасы Назарбаевтың бастамасымен негізі қаланған Түркі тілді мемлекеттердің кеңесі Ан­ка­радағы мәжіліске өзек болды. Мен Қазақстан Парламентінің депутаты ретінде Түркі тілдес мем­лекеттердің Парламенттік Ассам­блеясына  ерекше тоқталғым келеді. Қазақстан Президентінің бас­тамасымен құрылған бұл маңызды құрылым бүгінде жемісті қызмет  атқаруда. Біздің елдердің парла­менттері арасында ынтымақтастық нығая түсуде. Сонымен қатар, таяуда Астанада Түркі әлемінің академиясы және ақсақалдар алқасы құрылады. Міне, осының бәрі Қазақстан тарапының Нахчыван келісіміне бастамашы  ғана емес, оны табан­ды түрде жүзеге асырушылардың бірі екенін айғақтайды. Биылғы жыл – түркі тілдес мемлекеттер үшін аса маңызды жыл. Биыл Қа­зақ­стан Еуропадағы қауіпсіздік және ынтымақтастық ұйымына төрағалық етіп отыр. Түркия Қа­зақ­станның бастамасымен құрыл­ған Азиядағы өзара іс-қимыл және сенім шаралары жөніндегі кеңес­ке жетекшілік жасайды. Сондай-ақ, Еуропа Одағы Парламенттік Ассамблеясына төрағалық етуде. Қазақстан 2011 жылы Түркияның ұсынысымен Ислам Конферен­циясы Ұйымына бас­шылық етуге әзірленуде. Осы маңызды, тарихи мәні зор беделді ұйымдарға жетекшілік ету барысында түркі тілдес мемлекет­тердің өзара ықпалдастығы мен бірін-бірі қолдауы Нахчывандағы келісімнің өміршеңдігін арттыра түседі деп ойлаймын. Бұл біздің баршамызға үлкен жауапкершілік жүктейді. Нұрлан ӘБДІРОВ, Мәжіліс депутаты.