Бүгін өңір орталығындағы «Атырау» спорт кешенінде Қазақстан Республикасының бокстан V жастар спорттық ойындары басталды.
Төрт жылда бір өтетін спорттық сайысқа 400-ге жуық жас былғары қолғап шебері бақ сынауға кірісті. Боксшылар 11 салмақта сынға түседі. Жеңімпаздар 23 мамырда анықталады.
«Тәуелсіздік алғаннан бері спортшыларымыздың спорттың әр түрінен байрақты бәсекелерде топ жарып, ел абыройын асқақтатып жүргеніне куә болып келеміз. Егемен Қазақстанымыздың рухы биік, ерік-жігері мықты, дені сау жас ұрпағын тәрбиелеуде мұндай спорттық шараның маңызы зор» деді облыс әкімінің орынбасары Бақытгүл Хаменова.