«7-20-25» тұрғын үй бағдарламасы бойынша 60 мыңнан астам өтініш келіп түскен. Осыншама өтініштің құны 727,4 млрд теңгені құрайды екен. Әрине, мұның бәрі бірдей қабылданбасы белгілі.
Ұлттық банк таратқан ақпарат бойынша, биыл 27 мамырда тіркелген 60 398 өтініштің 35 280-і ғана мақұлданған. Яғни келіп түскен өтініштің тең жартысы ғана талапқа сай болған. Енді осы мақсатқа 426,6 млрд теңге бөлінбек. Бұған дейін бағдарлама аясында 325 млрд теңгеге несие берілгені хабарланған болатын.
Еске салсақ, жақында ғана Қаржы нарығын реттеу және дамыту агенттігінің басшысы Мәдина Әбілқасымова «7-20-25» және «Баспана хит» бағдарламаларының жабылатынын айтқан еді.
«Дағдарыстың экономикаға әсерін төмендету үшін нарықтық ұстанымдарға орын бере отырып мемлекеттің несиелеу бағдарламаларынан біртіндеп шығуын қамтамасыз ету керек. Осыған байланысты Ұлттық банк 2023 жылдан бастап мемлекеттік бағдарламаларды қаржыландыруды тоқтата бастайды. 2021 жылы «Баспана хит», ал 2022 жылы «7-20-25» бағдарламасы аяқталады», деп мәлімдеді агенттік төрағасы Алматыда өткен Cfo Idea exchange & networking саммитінде.
«7-20-25» әлеуметтік бағдарламасы займ беруді 2018 жылы 4 шілдеде бастаған. Несие тек ұлттық валютамен беріледі. «Қазақстанның орнықтылық қоры»АҚ PR-менеджері Айбар Олжаевтың айтуынша, бағдарламаға елдің барша азаматы қатыса алады.
– Бүгінгі таңда осы бағдарлама бойынша 325 млрд теңгеге несие берілді. Бұл өз кезегінде бастапқы тұрғын үй нарығынан 27 мың қазақстандық отбасының үйлі болуына септігін тигізді. Бағдарламаға Қазақстанның барлық азаматтары қатыса алады. Бастысы азаматтың атында үй және басқа ипотекасы болмауы тиіс. Сонымен бірге табыс ресми расталуы қажет. Егер сіз айлық алатын болсаңыз, онда ол бойынша зейнатақы қорына салымдар түсіп тұруы керек. Ал жеке кәсіпкер болсаңыз, онда банк сізден жылдық салық декларациясын талап етеді, – дейді қор өкілі.
Бағдарламаның мерзімі шектеусіз болып бекітілген. Жоба бекітілген 1 трлн теңге лимитіне жеткенге дейін жүзеге асырыла береді.