Былтыр Үкімет басшысы Асқар Мамин мен Татарстан Президенті Рустам Минниханов Тобыл өңіріне жұмыс сапарымен келіп, осында «KamLitKZ» шойын зауыты мен жүк техникаларына арналған жетекші белдеме зауытының іргетасын қалау рәсіміне қатысқан еді. Ресми жиында зауыт құрылысының 2-3 жыл ішінде аяқталатыны айтылған.
Осы зауыттарда жұмыс істейтін мамандарды оқыту ісі қазірден бастап қолға алынды. Машина жасау саласына қажетті сапалы мамандарды даярлау үшін Қостанай автожол колледжі таңдалып алынып, оқу орнына жайлы жатақхана мен заманауи зертхана салып беру үшін облыс бюджетінен 400 млн теңге қаржы бөлінді.
Сондай-ақ былтыр Қостанай автожол колледжінде «КамАЗ» жобасы аясында «қара металдар металлургиясы», «механикалық өңдеу», «өнеркәсіптегі бақылау-өлшеу аспаптары және автоматика», «токарлық іс және металл өңдеу», «машина жасау технологиясы», «автоматтандыру және басқару» сияқты жаңа мамандықтар ашылған. Бұл мамандықтар бойынша биыл бірінші курсты 125 студент тәмамдап отыр. Колледж директоры Дмитрий Павленконың айтуынша, алдағы оқу жылында тағы 125 студент оқуға қабылданбақ.
Өңірде жүзеге асырыла бастаған ауқымды жобалар аясында көлік құрастыру саласына қатысты бес бірдей жаңа мамандық ашқан білім ордасына өткен аптада «КамАЗ» ЖАҚ бас директорының бірінші орынбасары Юрий Герасимов арнайы келіп, оқу орнымен өзара ынтымақтастық жөнінде келісімге қол қойды.
– Біз Қостанайдағы «KamLitKZ» зауыты мен жетекші белдеме зауытының іске қосылуын асыға күтіп отырмыз. Қазір бірлескен жоба кезең-кезеңімен уақтылы жүзеге асырылып жатыр. Ең бастысы, бұл зауыттарда жұмыс істейтін болашақ мамандар даярлау мәселесін қатар қолға алдық. Машина құрастыру саласының мамандары бізге аса қажет. Біз «КамАЗ» көліктерін шығаратын болсақ, колледж сол көлікті құрастыратын мамандарды даярлайды. Қазір колледжде 300-ге жуық студент білім алып жатыр. Өз жатақханасы бар. Оның құрылысына 1 млрд 300 млн теңге бағытталып отыр. Яғни жан-жақты қолдау көрсетіліп жатыр. Мен бүгінгі колледж студенттерінің бір-екі жылдан соң жаңа зауытқа жұмысқа орналасып, одан әрі кәсіпорынның білікті маманы болып шығатынына сенім білдіремін, – деді «КамАЗ» ЖАҚ бас директорының орынбасары.
Қостанайда жаңа салынып жатқан «KamLitKZ» шойын зауыты мен құрылысының бірінші кезеңі биыл қазан айында аяқталады. Зауыт 2023 жылы түбегейлі салынып бітеді деп жоспарланып отыр. Құны 80 млрд теңге болатын ауқымды жоба іске қосылса, мұнда 300-ден астам жаңа жұмыс орны пайда болмақ.
Аталған зауытта кейінгі буынды «КамАЗ» және басқа да ауыр жүк көліктері үшін шойыннан құйылған белдеме картерлері, цилиндр блоктары мен қозғалтқыш цилиндрі блогының бастиектері шығарылады. Кәсіпорын өндірістік қуатына толық көшкен соң, мұнда жылына жалпы көлемі 40 мың тоннадан астам ауыр жүк көліктеріне арналған шойын қосалқы бөлшек жасалады. Оның 95 пайызын экспортқа жөнелту көзделіп отыр.
Қостанай облысы