Түркістан облысындағы автомобиль жолдарының жақсы және қанағаттанарлық жағдайы алдағы 5 жылда 99,5%-ға жеткізіледі, деп хабарлайды Egemen.kz
Облыстағы жалпы пайдаланымдағы автомобиль жолдары мен елді мекен көшелерінің сапасын арттыру мәселесі облыс әкімі Өмірзақ Шөкеевтің бақылауында. Түркістан облысында алдағы 5 жылда 2,3 мың шақырым жол салынып, жөндеуден өтеді. Облыстың әлеуметтік-экономикалық дамуының 2021-2025 жылдарға арналған Кешенді жоспары аясында оңтүстік-батыс айналма жолы, Сарыағаш қаласын айналма жолы, Түркістанның Шығыс айналма жолы, сондай-ақ Түркістан-Шымкент-Ташкент жүрдек теміржол магистралі салынады.
Түркістан облысында жыл соңына дейін жақсы және қанағатты жағдайдағы облыстық және аудандық маңызы бар автомобиль жолдарының үлесін 79 %-дан 81,4%-ға арттыру көзделуде. Бұл көрсеткішті 2025 жылға дейін 90%-ға арттыру жоспарланған. Биыл автомобиль жолдарын жөндеуге бөлінген қаражаттың басым бөлігі жергілікті маңызы бар жолдарға бағытталады.
Құрылыс-жөндеу жұмыстарымен жалпы 300-ден астам нысан, не 1200 шақырымға жуық жолдар мен көшелер қамтылған. Жыл соңына дейін 700 шақырым жол пайданалуға беріледі.
Мақтаарал, Жетісай, Келес аудандары аумағында ұзындығы 478 шақырым жолдар күрделі және орташа жөндеуден өткізілуде. Одан бөлек, осы аудандарда облыс әкімінің тапсырмасымен жалпы ұзындығы 180 шақырымнан асатын
11 облыстық маңызы бар автомобиль жолдары жөндеуден өткізілуде. Бұл жолдарды қыркүйек айында толықтай пайдалануға беру жоспарлануда. Жолдар Қазығұрт, Түлкібас, Созақ, Бәйдібек аудандары мен Арыс қаласында да жүргізіліп жатыр.
Биыл Түркістан-Балтакөл, Кентау-Ащысай, Шымкент-Қарамұрт, Ақсукент-Қарамұрт, Шымкент-Сайрам, Шарапхана-Жаңабазар бағыттарындағы жолдарды пайдалануға беру және Мақтаарал, Жетісай, Келес аудандарындағы облыстық маңызы бар автомобиль жолдарын жөндеу жұмыстары аяқталады.
Түркістан - Балтакөл, Түркістан-Қарнақ-Кентау бағыттарында 80 шақырым автомобиль жолдары күрделі және орташа жөндеуден өткізіліп, жыл соңына дейін пайдалануға беріледі. Сонымен қатар, Түркістан-Қарнақ-Кентау, Кентау-Ащысай бағыттарындағы 53,7 шақырым жолдарды орташа жөндеуге тиісті қаржы қаралды. Шардара-Арыс бағытындағы жалпы ұзындығы 41 шақырым жолдың күрделі жөндеу жұмыстары тамыз айында толығымен аяқталатын болады. Ақсукент-Қарамұрт, Шымкент-Сайрам, Шымкент-Көксәйек бағыттарындағы 50 шақырым күре жолдар қайта құру, күрделі және орташа жөндеуден өткізілуде. Жаңарған жолдар қыркүйек айына дейін ашылады.
Отырар ауданының Шәуілдір-Көксарай-Байырқұм және Отырар қалашығы бағыттарында 42 шақырым жолды орташа жөндеуге тиісті қаржы қаралды, нысандар келесі жылға өтпелі. Ордабасы ауданының Темірлан-Қызылсеңгір, Қайнар-Ұялыжар, Бадам-Шұбар бағыттарындағы 68,4 шақырым құрайтын жолдарға орташа жөндеу жұмыстары басталатын болады. Нысандар келесі жылға өтпелі.