Мемлекеттік рәміздерді қорлаған Павлодар облысының тұрғыны әкімшілік жауапқа тартылды. Ол өзінің инстаграм парақшасында ұлттық құндылыққа нұқсан келтіріп, ар-намысты таптайтын бейәдеп жазба қалдырған, деп хабарлайды Egemen.kz.
Аталған оқиғаға байланысты Павлодар қаласының тұрғыны 5 маусымда полицияға шағымданған.
Көп кешікпей тәртіп бұзушы анықталды. Ол Ефремовка ауылының 38 жастағы тұрғыны болып шықты және заңсыз әрекетке мас күйінде барғанын түсіндіріп, кінәсін толық мойындаған. Сот шешімімен әкімшілік құқық бұзушылыққа жол берген ауыл тұрғынын бір тәулікке қамауға алу түрінде жаза қолданылды.
«Материал сотқа жіберілді және 6 маусым күні сот отырысы онлайн режимде өтті. Онда ауыл тұрғыны өзі жіберген қателігін дәйектер келтіре отырып, толық мойындады және сот үкімімен әкімшілік қамауға алынды», деп хабарлайды облыстық ПД ресми өкілі Жанна Белялова.