Қостанай-Алматы бағытымен келе жатқан жолаушы өзімен бірге 117 миллион теңге салынған сөмкесін алып жүрген. Сөмкені қолды қылған ұрылар оларды полиция ұстағанша екі автокөлік сатып алып үлгерген, деп хабарлайды Egemen.kz.
«31 мамырда 22 жастағы жолаушы Қостанай-Алматы бағытындағы пойызбен келе жатып, өзімен 116 миллион 900 мың теңге алып жүрген. Ол еш күдіктенбей кешке ұйықтап жатқан, алайда түнде Жақсы бекетінде оянған кезінде ақшаның жоғын түсінген», делінген хабарламада.
Жәбірленуші батальон қызметкерлерінен көмек сұраған. Департамент қызметкерлері жедел тергеу тобын құрып, іздеуді бастады. Теміржол көлігінің барлық нысаны, сондай-ақ жақын орналасқан елді мекендер тексерілді.
Полиция қызметкерлері пойыздың барлық қызметкері мен жолаушысынан сұхбат алды. Нәтижесінде күдіктінің фотороботы жасалды.
«8 маусымда Нұр-Сұлтан қаласының көлік полициясының қызметкерлері ұрлық жасады деген күдікпен үш адамды анықтап, ұстады. Күдіктілердің тұрғылықты жері бойынша тінту жүргізілді, оның барысында 12,6 миллион теңге және 198,5 мың доллар тәркіленді.
Күдіктілер ұрланған ақшаның бір бөлігін қылмыс жасалғаннан кейін бірден екі көлік сатып алған», делінген хабарламада.