Қазақстанда алғашқы кальцийлендірілген сода өндіретін зауыт Жамбыл облысының Сарысу ауданында салынады. Жоба Yildirim Holding түрік компаниясының еншілес кәсіпорны Qazaq Soda ЖШС-не тиесілі. Жобаны іске асыру 2021 жылдың 3-тоқсанына жоспарланған, деп хабарлайды Egemen.kz.
Бірінші кезеңде зауытқа салынатын инвестиция көлемі 400 млн долларды құрайды. Кәсіпорынның қуаттылығы жылына 1 млн тоннаға дейін өнімді құрайды. Қуаты 500 мың тонна болатын бірінші кезеңді 2024 жылы аяқтау жоспарланып отыр. Құрылыс кезінде негізінен жергілікті тұрғындар арасынан 1000-ға жуық маман тарту жоспарлануда. Кәсіпорын пайдалануға берілгеннен кейін 300 жаңа жұмыс орны және 1000 жанама жұмыс орны құрылады.
Осы жобаны іске асырғаннан кейін Қазақстан әлемдегі жетекші сода өндіруші – Қытай, Түркия, АҚШ және Ресеймен бір сатыға көтеріледі. Кәсіпорын Қазақстанға кальцийлендірілген сода импортынан кетуге мүмкіндік береді, сондай-ақ елдің ішкі қажеттіліктерін толық жабады және болашақта экспортқа жеткізуді бастайды деп күтілуде.