Отбасының ойранын шығарып, қит етсе әйеліне жұдырық ала жүгіретін еркектердің 80 пайызы тұрақты жұмыс істемейді. Ал елімізде тіркелетін тұрмыстық зорлық-зомбылықтың жартысына жуығы ішімдіктің салдарынан туындайды. Көңілге қаяу түсіретін мұндай статистиканы онлайн өткен брифинг барысында ІІМ Әкімшілік полиция комитеті төрағасының орынбасары Алексей Милюк жариялады.
«Тұрмыстық зорлық-зомбылық профилактикасы туралы» Заң қабылданған 12 жылдың ішінде бұл құжатқа 12 рет өзгерістер мен толықтырулар енгізілген екен. Ал өткен жылдан бастап Мемлекет басшысының тапсырмасымен тұрмыстық зорлық-зомбылық үшін жауапкершілік тағы күшейтілді. ІІМ өкілінің мәлімдеуінше, жыл басынан бері полиция қызметкерлері 47 мыңнан астам қорғау нұсқамасын шығарса, тағы 6 мыңға жуық отбасы тиранына сот арнайы талаптар белгілеген.
Тұрмыстық зорлық-зомбылықтың көбіне-көп жасырын сипатта болатынын айтқан спикер әдетте әйелдердің отбасындағы дау-жанжалды сыртқа шығармай, іште тұмшалап, жасырып қалатынын жеткізді. «Отбасылық тиранның озбырлығынан қорғану үшін олар тіпті полицияға да барғысы келмейді», деді А.Милюк.
Елімізде тұрмыстық зорлық-зомбылыққа қарсы күрес күшейтілді, заң талаптары да қатаңдатылды. Алайда заңдық тұрғыдан осындай әдістерді белсенді қолдану екінші бір мәселені туындатып отыр. Соңғы уақытта елімізде ажырасу көбейіп кеткен. Статистикаға сәйкес, 2020 жылы елімізде 14700 отбасылық жұп ажырасса, олардың дені – 1 жылдан 4 жылға дейін ғана некеде болғандар. Ал 2300 шаңырақ тіпті бір жылға жетпей шайқалған.
«Мұндай жағдай елдегі тірі жетімдер қатарын қалыңдатып, толық емес және аз қамтылған отбасылар санының артуы, алимент төлеуден жалтарған жауапсыз әке секілді онсыз да күрмеуі қиын әлеуметтік мәселелерді күрделендіріп отыр», деген спикер тұрмыстық зорлық-зомбылықты бөгеу үшін, ең алдымен, оған жол беретін себептердің алдын алу керек екенін тілге тиек етті. Осыған орай Ішкі істер министрлігінің өкілі: «Жақындарына күш көрсететін құқық бұзушылармен де, зорлық-зомбылық құрбандарымен де кешенді оңалту және психокоррекциялық жұмыстар жүргізуге бет бұруымыз қажет», деді.
«Тұрмыстық зорлық-зомбылық пен ажырасудың алдын алуда отбасылық құндылықтарды арттырып, саламатты өмір салтын ұстанудың маңызы зор. Осыған орай ІІМ қазіргі уақытта депутаттық корпуспен бірлесіп құқық бұзушылар үшін оңалту бағдарламаларын енгізу мәселелерін жан-жақты қарастыру үстінде. Ал бұл бастамаларды отбасы институтын нығайтудың жекелеген мәселелері бойынша заң жобасы шеңберінде іске асыру жоспарланып отыр», деген ведомство қызметкері отбасындағы зорлық-зомбылықтың алдын алу үшін үкіметтік емес ұйымдардың әлеуетін тиімді пайдалану керектігін де атап өтті. «Мұндай ұйымдар тұрмыстық зорлық-зомбылық құрбандарына баспана беріп қана қоймайды, оларға құқықтық, медициналық, әлеуметтік, сондай-ақ психологиялық тұрғыдан көмек көрсетеді, тренингтер мен консультациялар өткізеді», деген А.Милюк өз шаңырағында ерінен зорлық көріп, зомбылықтың құрбаны болған кез келген жан осындай ұйымдарға жүгіне алатынын, болмаса полиция қызметкерлерінің тікелей көмегімен дағдарыс орталықтарына орналаса алатындығын айтты.
Ал бүгінде еліміз бойынша 49 дағдарыс орталығы жұмыс істесе, оның 39-ы арнайы баспанамен қамтамасыз етілген. Биылдың өзінде полиция қызметкерлері отбасынан жылу таппай, таяққа жығылып, қиын жағдайға тап болған 3 мыңнан астам әйелді дағдарыс орталықтарына орналастырған.