Бүгінде Сыр аймағында басталған “Батыс Еуропа-Батыс Қытай” күрежол құрылысы қарқын ала бастады. Облыс аумағында 817 шақырым жолды қамтитын құрылысқа қажетті материалдар – қиыршықтас және шағыртас өндіру шұғыл қолға алынуда. Күні кеше Шиелі ауданына қарасты Қаратау бөктерінде аймақтың басты қазынасының бірі – қиыршықтас өндіретін зауыт іске қосылды.
“Казвернал” ЖШС негізінде жұмыс істейтін түркиялық мамандар жаңа техникаларды өндіріс алаңына әкеліп те үлгіріпті. Қаратау бөктерінде құлшына іске қосылған экскаваторлар Жапониядан, ал жүк көтергіштер АҚШ-тан әкелінген. Сондай-ақ, Голландиядан алынған алып техникалар да тас өндіру жұмыстарына жұмыла кірісіп кеткен. Зауыт жұмысы бүгінгі күн талабына сай компьютер арқылы басқарылып, тәулігіне 5 мың тонна көлемінде қиыршықтас өндіріліп, өңделуде екен.
Зауытта жұмыс істейтін жұмысшы-механизаторларға барлық жағдай жасалған. Оларға жатақхана, асхана, спорт алаңы, тағы басқа мәдени орындар қалтқысыз қызмет көрсетуде.
Зауыттың ашылу салтанатына нысанның бас құрылтайшысы, есімі елімізге танымал спортшы Дәулет Тұрлыханов сонау Астанадан атбасын бұрып келді.
– Алдағы уақытта, бұл зауытта 150 адам жұмыс істейтін болады. Демек, жергілікті тұрғындарды жұмысқа тартуға ұмтылыс жасалмақ. Тек айтарым, олар заманауи жаңа техникалардың тілін меңгерулері, яғни оқып, үйренуге бел шеше кірісулері қажет, – дейді Д.Тұрлыханов.
Қиыршықтас зауытының ашылу рәсіміне Көлік және коммуникация министрлігі Автомобиль жолдары комитетінің төрағасы Замир Сағынов, облыс әкімінің орынбасары Мадияр Алдоңғаров қатысты.
Еркін ӘБІЛ, ҚЫЗЫЛОРДА.