Қарағандыда Елбасы Н.Ә.Назарбаевтың Қазақстан халқына арнаған «Қазақстан жолы – 2050: бір мақсат, бір мүдде, бір болашақ» атты Жолдауы талқыланған облыс активінің жиналысы болып өтті.
Қарағандыда Елбасы Н.Ә.Назарбаевтың Қазақстан халқына арнаған «Қазақстан жолы – 2050: бір мақсат, бір мүдде, бір болашақ» атты Жолдауы талқыланған облыс активінің жиналысы болып өтті.
Алқалы басқосуда аймақ басшысы Бауыржан Әбдішев бұл маңызды құжатта алға қойылған міндеттерді қатысушыларға жан-жақты талдап-түсіндіріп, соған байланысты өңір алдында тұрған келелі мәселелерге кеңінен тоқталды. Мемлекет басшысы ұсынған 10 ілкімді идеяға сәйкес, әрқайсысы бойынша іс-шараларды жіктеп, оны атқарушы мемлекеттік органдар мен өндіріс, білім беру, денсаулық сақтау, әлеуметтік салаларға нақты тапсырмалар берілді. Аймақтың экономикалық ерекшелігіне орай тау-кен металлургиясы, машина жасау, фармацевтика өнеркәсібін одан әрі дамытуға басым көңіл бөлінетіндігі аталды. Сондай-ақ, табиғи қазыналарды ұтымды қолдана білудің маңыздылығына тоқтала келіп, бұл ретте, мәселен, метан газын пайдалануды іске асыру, мыс қорлары қалдықтарын қайта кәдеге жарату жөнінде міндеттер жүктелді.
Сонымен қатар, индустриялық-инновациялық дамуда үлкен ілгерілеушілік күтіп тұрғандығы айтылды. Ағымдағы жылы 13 өндіріс ашылып, 2 мыңға тарта адам жұмыспен қамтылуы тиіс. Салынатын 2 жылу-электр стансасы Теміртау мен Жезқазған қалаларын жылу және электр қуатымен қамтамасыз етуді жақсартады.
Жиында «Сарықазына» ЖШС директоры Павел Семиченко, Қарағанды мемлекеттік медициналық университетінің ректоры Раушан Досмағамбетова, облыстық өсімдік шаруашылығы және селекция ғылыми-зерттеу институтының басшысы Рашид Нұрғазиев, «Литуаника» литван этномәдени бірлестігінің жетекшісі Виталий Тваринос, гуманитарлық колледж оқушысы Ольга Татунович сөз сөйлеп, жаңа Жолдау еліміздің өсіп-өркендей түсуіне тың серпіліс туғызатынына ризалық білдірді.
«Қазақстан» шахтасының кеншісі Қанат Мұстафин шахтерлердің Президент Н.Ә.Назарбаевтың салиқалы да сарабдал саясатына қолдау білдірген үндеуін таныстырып, облыс әкіміне табыс етті.
Айқын НЕСІПБАЙ,
«Егемен Қазақстан».
ҚАРАҒАНДЫ.