Ішкі істер органдары қызметкерлерінің арасында биыл 11 жыл қатарынан ұйымдастырылған «Парасатты полицей» республикалық байқауы мәресіне жетті. Байқауда Нұр-Сұлтан, Алматы, Шымкент қалалары, облыстар және Көліктегі полиция департаменттері қызметкерлерінен, оның ішінде өзге этнос өкілдері бар 17 команда бақ сынасты.
Ел Тәуелсіздігінің 30 жылдығы мен Қазақстан халқы тілдері күнін мерекелеу аясында өткен биылғы байқаудың бас жүлдесін Нұр-Сұлтан қаласының полиция департаменті жеңіп алса, бірінші орынға Батыс Қазақстан өңірінің намысын қолдан бермеген полицейлер командасы табан тіреді. Ал жүлделі екінші орынды Алматы мен Қостанай облыстарының командалары өзара бөлісіп, 3-орын Ақмола мен Түркістан облыстарының ПД және Көліктегі ПД-нің еншісіне тиді. Дәстүрлі сайысқа қазылық жасаған алқа мүшесінің бірі ішкі істер органдары және Ұлттық ұлан қазақстандық ардагерлер ұйымының ардагері Сланқожа Қарақыстық ішкі істер органдары қызметкерлері арасында мемлекеттік тілді кеңінен насихаттауда «Парасатты полицей» сайысының алар орны ерекше екенін атап өтті.
Пандемияға байланысты биыл байқау онлайн форматта өткізілген. Ал ішкі істер органдары арасында кеңінен танымал сайыстың басты көздегені – тәртіп сақшылары арасында мемлекеттік тілдің мәртебесі мен маңызын арттыру, қолданысын кеңейту болып саналады. «Полиция қызметкерлерінің мемлекеттік тілге, еліне, Отанына деген құрметін арттыру, тілдік ортаны қалыптастыру, сондай-ақ, тіл мәдениетіне тәрбиелеуде де байқаудың алар орны ерекше. Сол себепті де болар «Парасатты полицейге» қатысу – әр қызметкер үшін мәртебе», дейді іс-шараға мұрындық болып жүрген ІІМ Идеологиялық және имидждік жұмыс департаментінің басшысы Альбина Махамбетова.