Меркель неге алаңдаулы?

Бұл сайлау ел үшін маңызды болып тұр. Өйткені сайлауға Ангела Меркель қатыспайды. Оның орнына кім канцлер атанатыны немістерге ғана емес, бүкіл әлем үшін қызық.

Сауалдамаға сүйенсек, қазір­гі таңда халық арасында Социа­листік-демократиялық партия­ның (SPD) беделі биік. Оны қол­дайтындар саны 25 пайызға жет­кен екен. Осы көрсеткішпен SPD қазір топ бастап тұр. Алда-жал­да сайлау дәл бүгін өте қалса, жеңімпаз осы партия атанатыны сөзсіз.

Сондықтан шығар, қазіргі канцлер Ангела Меркель халықт­ы өз партиясы Христиан-демок­ра­тия­лық партиясына дауыс беруге шақырды. Сонда ғана партияның жетек­шісі Армин Лашетті жаңа бун­дес­басшы ретінде та­ғайын­дау­ға жол ашылмақ.

«Дауыс берушілер алдында үлкен таңдау тұр. SPD мен Жасылдардан құралған үкімет. Олар Солшылдардың қолдауын иеленбек немесе оларды мақұл­дай­ды. Немесе канцлер Армин Лашет бастаған CDU және CSU партияларының үкіметі. Бұл біздің елді жарқын келешекке бастайды», деп мәлімдеді А.Меркель.

Канцлердің солшылдарды тілге тиек етуі бекер емес. Өйт­ке­ні олар қазіргі биліктегі көп­ші­лік дауысқа ие Христиан-де­мо­кра­тиялық партиясының оппозициясы саналады.

Кейінгі уақытта CDU-дің басынан бақ тая бастады. Партияның жетекшісі әрі Меркельдің ізбасары болып Армин Лашет сайланған еді. Алайда оның ел ішіндегі беделі жоғары емес. Коронавирус індеті жаппай тарағанға дейін ол туралы ел ішінде жылы пікір қалыптасқан-тұғын. Бірақ пандемия бәрін өзгертіп кетті. Мәселен, Лашет басшылық еткен Солтүстік Рин-Вестфалия өңірі вирустан қатты зардап шекті. Аймақта дертке шалдыққандар саны күн санап артып жатқан кезде Лашет локдаун енгізуге асыққан жоқ.

Оның үстіне, алғашқылардың бірі болып карантиндік шектеу шараларын жеңілдетуге кірісті. Осылайша, әп-сәтте тұр­ғын­дар­дың наразылығына ұшырады. Биылғы шілдеде Еуропада су тасқыны болып, біраз ел зардап шегіп, мыңдаған адам қайтыс болғаны белгілі. Германияда шамамен 177 адам қаза тапты. Осы оқиғадан кейін президент Франк-Вальтер Штайнмайер бастаған билік өкілдері су тасқынынан зардап шеккен өңірлерге барған-ды.

Көңіл күйі жоқ президент жур­налистерге сұхбат беріп жат­қан­да, артқы жағында Ла­шет­тің әріптесімен әзілдесіп, күліп тұрғаны бейнежазбаға түсіп қал­ды. Содан кейін немістер оны сынға алып, ел қайғырып жат­қан­да күлгенін айыптады. Көп ұзамай-ақ Лашет кешірім сұрады. Бірақ қайғыдан қабырғасы қа­йыс­қан халыққа бұл әсер ете қойған жоқ.

Жығылғанға жұдырық де­мек­­ші, бұған дейінгі сауалдамалар­да Жасылдар партиясы озық шы­­ғып, саяси элитаны бір дүр сілкінткен еді. Енді Социалистік-де­мо­кратиялық партия алдағы сай­лауда жеңістен дәмелі.

Оның үстіне, SPD атынан саяси додаға түсіп жатқан Олаф Шольцтің халық арасында бе­де­лі жоғары. Қазіргі таңда ол Германияның вице-канцлері, қар­жы министрі қызметін атқа­ра­ды. Егер Меркельдің сөзі не­міс­тердің пікірін өзгерте алмаса, онда Социалистік-демократиялық пар­тия­ның жеңісі уақыт еншісіндегі шаруа.

Алда-жалда SPD жеңіске жете қалса, партияның алдында екі жол бар. Жасылдар мен Еркін демократтар (FDP) партияларымен коалиция құру. Немесе Жасылдар мен Солшылдармен тізе қосу. Екі жағдайда да Социалистік-демократиялық партия бүгінге дейін Парламентте көпшілік орынға ие болып келген CDU-дан ауылын алыс қондырады.

Қазіргі таңда Бундестагты CDU мен SPD коалициясы бас­қа­рып келгені белгілі. Ендеше, алдағы сайлау Ангела Меркельдің ке­туімен ғана емес, билеуші коа­ли­цияның өзгеруімен де есте қал­мақ.