Кеше Астанада Премьер-Министрдің бірінші орынбасары Бақытжан Сағынтаевтың қатысуымен Көлік және коммуникациялар министрлігінің алқа отырысы болды. Оған аталған саланың министрі Асқар Жұмағалиев төрағалық етті. Мәжілісте өткен жылғы жұмыстар қорытындыланып, алда атқарылатын міндеттер нақтыланды.
Алқа мәжілісіне сала мамандарымен қатар, Парламент депутаттары мен Президент Әкімшілігі қызметкерлері келді. Жиналған қауымды күн тәртібімен таныстырған А.Жұмағалиев, өткен жылдың қорытындысы туралы баяндай келіп, дәл бүгінгі күнде министрліктің алдында тұрған міндеттер жөнінде әңгімеледі. Мемлекет басшысы мен Үкімет жүктеген тапсырмалар мүлтіксіз іске асырылып жатқаны жайлы айтты. «Өткен жылы 2200 шақырым республикалық маңызы бар автожол жөнделді. Заман талабына сай 13 бірдей электронды таразы орнатылды. Сондай-ақ, көліктік бақылаудың 11 тұрақты бекеті жабылып, теңіз порттарының жүктерді өткізу қабілеті 16,8 млн. тоннаға дейін ұлғайтылды.
Ал, әуеде 15 халықаралық авиамаршрут, теміржолда 6 бірдей жолаушы бағыты ашылды. Оған қоса, 241 қызмет көрсету мен рұқсат беру жүйесі автоматтандырылды. Тағы бір жетістігіміз, ұялы байланыс операторлары арасындағы интерконнект мөлшері 15 пайызға төмендетіліп, облыс орталықтарында 4G қызметін қосу ісі басталды. Сондай-ақ, ел тұрғындарының тең жартысы эфирлік сандық телерадиотаралымға қол жеткізді», деді министр.
Елдегі автожолдар да А.Жұмағалиевтың назарынан тыс қалмады. «Бұйыртса, ағымдағы жылы Астана-Бурабай ақылы тас жолынан 1 миллиард теңгеден астам қаржы түседі деп отырмыз. Осылайша, бұл учаскені күтудің барлық шығынын толық жабамыз», деп қайырды ол. Негізі автожол ақылы болғаннан бері шамамен жарты миллиардтай теңге жиналыпты. Министр өткен жылы жемісті атқарылған жұмыстарды тізбелей келіп, жолдарды жөндеу ісіне көптеп жаңа техника-технологиялар тартылып жатқанына тоқталды. Былтыр автопарктер мен теміржол парктерінің айтарлықтай жаңарып, жаңғырғанын тілге тиек етті. Мәселен, автопарктер 1700 жаңа автобус пен 840 жаңа жүк машинасымен толығыпты. Теміржолда 97 локомотив, 1704 жүк және 237 жолаушы вагондары жаңаланыпты. Коммуникация саласына да кеңінен тоқталған министр үстіміздегі жылы орындалатын міндеттер жөнінде айтты.
2014 жылы елімізде республикалық маңызы бар 2,3 мың шақырым автожол жөнделіп, 18 қосымша электронды таразы орнатылады. Жаңадан 5 жоғары жылдамдықты теміржол бағыттары іске қосылады. Бұдан бөлек, 13 әуе бағдары ашылып, 160 электронды қызмет пен рұқсат беру құжаттары автоматтандырылатын болады. Десе де, биылғы негізгі жұмыс Мемлекет басшысының тапсырмасы бойынша әзірленген көлік инфрақұрылымын дамыту жөніндегі 2010-2014 жылдарға арналған және «Ақпараттық Қазақстан-2020» мемлекеттік бағдарламасында қарастырылған шаралар аясында атқарылады, деді А.Жұмағалиев.
Биыл «Электронды үкімет» дамуының жаңа кезеңі басталады екен. Атап айтқанда, smart government дамыту жөніндегі жұмыс жалғасады. Ол бойынша азаматтың жеке кабинеті жасалады. Ол e-gov порталының пайдаланушысына өзінің жеке деректерін бақылауға мүмкіндік береді. Сонымен қатар, 160 электронды қызметті автоматтандыру жоспарланып отырылған көрінеді. Ұтқыр электронды қызметтер мен сервистер тізімі 50-ге дейін кеңейтілмек.
Министрлік ұялы байланыс сапасын арттыру мақсатында аймақтарда тексеру жұмысын әрі қарай жалғастыра бермек. Одан тыс 2014 жылғы MNP-абонентке өз нөмірін сақтай отырып, операторды ауыстыруына мүмкіндік беретін технологияны тестілеу ұйғарылыпты. Осынау жағымды ақпараттармен баяндамасын аяқтаған министр Мемлекет басшысы мен Үкіметтің биылғы жылға жүктеген міндеттерін толық орындайтындарын айтты.
Алқа мәжілісін Премьер-Министрдің бірінші орынбасары Б.Сағынтаев қорытындылады. «Мемлекет басшысы «Қазақстан жолы – 2050: бір мақсат, бір мүдде, бір болашақ» атты Жолдауында Көлік және коммуникациялар саласында атқарылуға тиіс жұмыстарды нақтылап берді. Ол міндеттерді жүзеге асыруға мемлекетіміздің шамасы жетеді. Сондықтан алдын ала жасалған бағдарламалар мен олардағы жоба-жоспарларды дұрыс жүйелеп, жүзеге асыру жолдарын айқындап алу керек», деді Үкімет басшысының бірінші орынбасары. «Бүгінде жемісті жүргізіліп жатқан жұмыстарға қарамастан, жолдың сапасына қатысты мәселелер әлі де өзекті. Қазіргі уақытта жергілікті маңыздағы жолдардың – 40, республикалық тасжолдардың 20 пайызының жағдайы қанағаттанарлықсыз. Сондықтан осы бағыттағы жұмысқа үлкен көңіл бөлу керек», деп жалғады сөзін Б.Сағынтаев.
Оның айтуына қарағанда, көлік жағдайы да көңіл қуантпайды. Әлі күнге дейін көптеген елді мекендер автобуспен толық қамтылмаған екен. Қамтылғандарының тозуы жоғары деңгейде. Өкінішке қарай, бұл көрсеткіш 80 пайызға жуық көрінеді.
Кеден одағының техникалық регламентіне сәйкес, 2015 жылдың 1 қаңтарынан бастап одақ аумағында Еуро-5 стандарты енгізіледі. Ресей мен Белоруссия осы стандартқа өткен. Бұл біздің елге де қатысты. Көлік және коммуникация министрлігі мен жергілікті атқарушы органдар еліміз Еуро-5 стандартына көшкенге дейін автобус парктерін мейлінше жаңартулары қажет, деді Б.Сағынтаев. Себебі, келер жылдың басынан бастап автобустардың бағасы 18 пайызға дейін қымбаттайды екен. Сондықтан, Премьер-Министрдің бірінші орынбасары бұл шаруаға үлкен мән беріп, оң қадам жасау керектігін ескертті.
Нұрбай ЕЛМҰРАТОВ,
«Егемен Қазақстан».