Мемлекет басшысы Нұрсұлтан Назарбаев Премьер-Министрдің орынбасары – Индустрия және жаңа технологиялар министрі Әсет Исекешевті қабылдады, деп хабарлады Қазақстан Республикасы Президентінің баспасөз қызметі.
Ә.Исекешев Мемлекет басшысына министрліктің 2013 жылғы жұмыс қорытындылары, соның ішінде Үдемелі индустриялық-инновациялық даму бағдарламасын іске асыру және Индустрияландыру картасының жобалары, сондай-ақ, биылғы жылға арналған жоспарлар туралы баяндады.
Атап айтқанда, Ә.Исекешев өнеркәсіптің арқаулық салаларының өсу қарқыны, салалық бағдарламаларды жүзеге асыру және индустрияландыру аясында бизнесті қолдаудың негізгі шаралары жайлы хабардар етті.
Қазақстан Президенті өнеркәсіпті, электр энергетикасын, арнайы экономикалық аймақтарды одан әрі дамытуды, сондай-ақ, шетелдік инвестициялар тартуды қамтамасыз ету қажеттігіне назар аударды. Нұрсұлтан Назарбаев Үдемелі индустриялық-инновациялық даму бағдарламасының екінші бесжылдығы жобасының инновациялық қамтылуын ескере отырып, сапалы әзірлеудің маңыздылығын атап өтті.
Кездесу қорытындысында Мемлекет басшысы бірқатар нақты тапсырмалар берді.
Суретті түсіргендер С.БОНДАРЕНКО, Б.ОТАРБАЕВ.