Ертең ХХІІ Қысқы Олимпиаданың алауы тұтанады

Дүние додасының дүбірі

Ақ Олимпиаданы ақпараттық қолдау

Президент жанындағы Орталық коммуникациялар қызметінде Сочиде жалауын көтеретін қысқы Олимпиаданы отандастарымыздың тамашалауы жайында брифинг өтті. Басқосудың бұл жолғы қонақтары Әділет министрлігі Зияткерлік меншік құқығы комитетінің төрағасы Абзал Естаев пен Мәдениет және ақпарат министрлігі Ақпарат және мұрағат комитетінің төрағасы Болат Қалиянбеков болды. «Биыл Сочи қаласында бай­рағы көтерілетін ХХІІ Қысқы Олим­пия ойындарын көрсету құқы­на «Хабар» және «Қазспорт» теле­арналары ие болып отыр. Дү­бірлі доданың ашылу салтанаты 7 ақпан күні Астана уақыты бойынша 22:00-де аталған телеарналарда тікелей эфирде көрсетілетін болады. Ашылу салтанатының хронометражы шамамен 3,5 сағатқа созылады. Ал сайыстың жабылу салтанаты 23 ақпанда жергілікті уақытпен 22:00-де өтеді. Алғашқы трансляция «Қазспорт» телеарнасынан 6 ақпан, бейсенбі күні сағат 11:55-тен бастап көрсетіле бастайды. Онда сноуборд жарысынан көрсетілімдер ұсынылады. Жалпы, көрермендерге ыңғайлы болу үшін республикалық «Егемен Қазақстан» мен «Казахстанская правда» газеттерінің 5 ақпан күнгі санының соңғы беттерінде жарыс кестесі берілген. Он­да қазақстандық спортшылар қа­ты­сатын барлық жарыстар белгі­ленген», деді Мәдениет және ақпарат министрлігі Ақпарат және мұрағат комитетінің төрағасы Б.Қалиянбеков. Сонымен қатар, ол дүйім жұрт көз тіккен дүбірлі жарысқа елімізден 47 журналист аттанғанын және оның 15-і сол жерден сайыс біткенше хабарлар тарататынын да назардан тыс қалдырмады. Эфирге шығатын тікелей көр­сетілім мен жазылым арқылы көр­сетілетін эфирлерді қосқанда барлығының жалпы уақыты 350 видеоконтентті құрамақ. «Хабар» телеарнасы 51 трансляция көр­сет­се, оның 34-і тікелей болмақ. Ал «Қазспорт» телеарнасы 140 көр­сетілімнің 78-ін тікелей эфир ар­қылы ұсынбақ. Ақ Олимпиада ке­зінде «Қазспорт» телеарнасы өзі­нің эфирін толықтай дерлік атал­мыш шараға арнамақшы. Қазақстандық телекөрермендер Олимпия ойындарын дер кезінде тамашалауға мүмкіндік алып отыр. Барлық көрсетілімдерді ком­ментаторлар қазақ және орыс тіл­дерінде жүргізеді. Сондай-ақ, көр­сетілімге комментаторлардан бөлек белгілі спорт саңлақтары мен ардагер спортшыларды тарта отырып, көрермендер үшін сайыс­ты тартымды беруге барынша назар аударылған. Әбдірахман ҚЫДЫРБЕК, «Егемен Қазақстан».

«Сынға дайынмын!»

Сочидегі ақ Олимпиадада бақ сынайтын Қазақстан ұлттық құрамасының сапында Қарағанды өңірінен жалғыз-ақ спортшы бар. Ол –мұздың үстінде желмен жарысқан жүйрік жерлесіміз Екатерина Айдова. Бұл күнде әлемдік деңгейдегі тісқаққан конькишілердің қатарынан саналатын Екатерина – ел үміт артып отырған санаулы саңлақтардың бірі. Екатерина 2010 жылы Ұлттық құрама сапында Ванкувер Олимпиадасына қатысты. Сол Олимпиададан кейін ол Берлин қаласында өткен жасөспірімдер арасындағы Әлем кубогы сынының абсолютті жеңімпазы атанған болатын. Сондай-ақ, 500 және 1500 метрлік қашықтықтарда ересектер арасындағы Қазақстан рекордын жаңартқан талантты спринтер. Туған қаласы Қарағандыға анда-санда бір келетін, оның өзінде бір-екі күн ғана аялдайтын Айдовамен тура ақ Олимпиаданың қарсаңында әңгімелесіп қалудың сәті түскен еді. – Екатерина, Сочи Олим­пиа­дасына дайындық қалай өтті? – Оқу-жаттығу жиындары не­гі­зінен Германия, Канада және АҚШ-тың биік таулы аймақтарындағы мұз айдындарында өтті. Қысқы мау­сым Әлем кубогы сынының төрт кезеңімен басталды. Бұл жарыс­тарда біз Олимпиадаға жолдама беретін ұпайларды сарапқа салдық. Мен үшін маусым сәтті бас­талды. Алдыма қойған мақсатыма жетіп, үш қашықтық бойынша лицензия жеңіп алдым. – Саған Сочи қаласындағы мұз айдыны таныс па? – Иә. Алдыңғы жылы әлем чем­пио­наты Сочиде өткенде болдым. Мен сол додада өнер көрсеттім. Шы­­нын айтқанда, Сочидің мұз айдыны Астанадағы біздің кешенге қат­ты ұқсайды. – Екатерина, Сочи Олим­пиа­­да­­сындағы өз мүмкіндігіңе қан­дай баға бересің? Бапкерің алдыңа қандай міндет қойып отыр? – Олимпиадаға қатысатын спортшылардың қайсысы болсын үмітсіз болмайды ғой. Төрт жылда бір өтетін мұндай додаға әлсіз спортшының келмейтіні белгілі. Әлбетте, сәттілік дегенді жоққа шығаруға тағы болмайды. Өзіме келетін болсам, дайындығым жаман емес. Додаға түсерде өзімнің нағыз спорттық бабымда болам деген сенімдемін. Бапкерім жарыс жолында қателікке бой алдырмай, бәрін де аспай-саспай дұрыс істеуді құлағыма құйып жатыр. – Олимпиада сынында басты қарсыласым болады деген спортшыларды атай аласың ба? – Негізі, мен үшін бәрі де бас­­ты қарсылас. Бірақ, азиялық конь­­ки­шілерді – Жапония, Корея және Қытай спортшыларын бөле-жара айтар едім. Неге десеңіз, бір құр­лықтан болған соң біздің арамыз­дағы іштей бәсекелестік қашанда бұрқ-сарқ қайнап жатады. – Екатерина, коньки спорты­мен жалпы қай кезден бастап ай­на­­лыстың? – Қарағандыдағы №83 орта мек­­­теп­тің 4-сыныбында оқып жүр­ге­німде конькимен жүгіру спор­ты­на балаларды іріктеп алды. Со­лардың қатарында мен де болдым. Алғашқы жаттықтырушым Вене­ра Талғатқызы Гриневецкая бол­ды. Содан кейін 11 жасымда қазір­гі бапкерім Сергей Степанович Лос­кутниковтің қарамағына ауыстым. – Спортшылар отбасынан шық­қан боларсың? – (Күлді) Жоқ. Әкем Қара­ған­ды­дағы Күзембаев атындағы шахтада жұмыс істеген, қазір басқа кәсіппен айналысады. Анам – музыка маманы. Максим есімді ағам Қарағандыдағы Қазақстан-Ресей университетінің экономика факультетін тәмам­даған, қазір жұмыс істейді. Жал­пы, өзімнің кеншінің қызы еке­німді мақтан етемін. Серік Сә­пиев­тің, Геннадий Го­лов­киннің де әкелері кенші емес пе?! Ал өзім Қарағандыдағы Әлия Мол­дағұлова атындағы спортқа бейім­ді, дарынды балаларға ар­нал­ған об­лыстық спорт-интернатты бітір­дім. Бұл жерде мені екінші бапкерім Владимир Владимирович Левченко жаттықтырды. – Алғашқы ірі табысың туралы айтсаң... – 2006 жылы Алматыдағы Ме­деу мұз айдынында Қазақстан чемпионаты өтті. Сол жарыста мен чемпион атанып, Қытайдың Чан-Чун қаласында өткен жасөспірімдер ара­сындағы әлем чемпионатына жол­дама алдым. Бұл жеңіс мен үшін өте маңызды болды. Ұлт­тық құрама команда сапына қабыл­данып, Сергей Валерьевич Сургу­ти­нов сынды білікті бапкердің қара­ма­ғында жаттыға бастадым. Бір сөз­бен айтқанда, Медеудегі жеңіс спорт­тағы карьерама жол ашып берді. – Сочи-2014 қысқы Олим­пиа­дасына арналған спорттық киім үлгісі ұнады ма? – Шынымды айтсам, біздің спорт­тық форма үлгілерін көріп, оның әдемі дизайнына таң-тамаша қал­­дым. Жаңа заманға сай, өзіндік сән мәнері бар екен. Меніңше, біздің фор­­ма үздіктердің қатарынан орын алуы тиіс. – Дастарқан мәзірінен не ұнай­ды? – Менің сүйікті асым – қазақтың ет та­ғамы. Мейрамханаларға бара қал­ғанда, көбіне осы асқа тапсырыс беремін. Жалпы, біз, конькишілер соншалықты диета сақтап жатпаймыз, көңіліміз қалаған асты жей береміз. – Саған басқа мемлекеттің аты­­нан өнер көрсетуге шақырған ұсы­­ныстар түсіп жатса қайтер едің? – Білесіз бе, маған осындай сұ­рақ­тар жиі қойылады. Мұндай сұраққа беретін жауабым да дайын: мен тек Қазақстанның туы астында ғана өнер көрсетемін. Қазақстан сияқты жан-жақты дамып келе жатқан ел­де өмір сүре­тініме шүкіршілік ете­мін, сали­қалы саясат ұстанатын Пре­зидентіміздің барлығын мақтан етемін. Мен – еліміз Тәуелсіздігінің төл құрдасымын. Сондықтан, Тәуелсіздік деген ұғымның мен үшін маңызы зор. Бір сөзбен айтқанда, мен – өз Отанымның патриотымын! – Екатерина, өзің көптеген елдерде болып жүрсің. Салыс­тырмалы түрде, біздің елдегі спорт­тың даму барысы туралы не ай­тар едің? – Біздің спорт ілгері дамып келеді. Қазіргі таңда бізді халық­ара­лық аренада жұрттың көбі тани­ды, бізбен санасатын болды. Расын айтқанда, біздің осы дәрежеге жетуі­мізге спортшыларымыздың Лон­дон Олимпиадасындағы тамаша же­тістіктерінің сеп болғаны сөзсіз.

Әңгімелескен

Айқын НЕСІПБАЙ,

«Егемен Қазақстан».

 ҚАРАҒАНДЫ.