Өткен жылдың аяғында Казталов аудандық Мәдениет үйі мен осы ауданға қарасты Жалпақтал ауылындағы мәдениет үйінің есіктері күрделі жөндеулер жүргізілгеннен кейін қайта ашылған еді. Мұның алғашқысына республикалық бюджеттен 75 млн. 948 мың теңге, екіншісіне 77 млн. теңге бөлінген. Әрине ұқыпты, тиімді түрде пайдалана білсе аз қаражат емес. Мәдениет үйлерінің қайта ашылуына байланысты өткізілген салтанатты шаралар, оған облыс әкімінің орынбасары Бақтияр Мәкеннің қатысқаны жергілікті БАҚ-та кеңінен көрсетілді.
«Жақсыны көрмек үшін» дегендей, Казталов ауданы орталығындағы күрделі жөндеуден өткізілген Мәдениет үйін тамашалаудың сәті биылғы жылдың 3 ақпаны күні түсті. Дәл осы күні аталған Мәдениет үйінде Казталов ауданының әкімі Нұрлан Бекқайыр тұрғындар алдында есеп берді. Залға қызғылт түсті жаңа орындықтар қойылыпты. Ортаңғы қатарлардың бірінде отырғанбыз. Бір кезде алдымыздағы ардагерлер орналасқан орындықтар бірінен соң бірі сынып, белдік ағаштары қирап түсе бастады. Олар жанбастарын сындырып алмағанымен залдағы лық толы халықтың алдында әжептәуір қолайсыздыққа ұшырады.
Осының алдында ауыл тұрғындары тарапынан айтылған күрделі жөндеудің мүлдем сапасыз жүргізілгені, оның көзге айқын көрініп тұрғаны Мәдениет үйіне қойылған кейбір бұйымдардың пайдаланылмай жатып сынғаны мен бүлінгені жөніндегі әттеген-ай дегізетіндей әңгімелерді естіген болатынбыз. Алайда, бұған онша мән бермеген едік. Енді тұп-тура көз алдымыздағы жоғарыдағыдай көріністерден кейін оған сенуге, илануға тура келді.
Бұған не деуге болады? Пайдаланылмай жатып қирай бастаған сапасыз орындықтардың өтеуін кім төлемек? Осындайда желге ұшқан есіл мемлекет қаражаты-ай, деп қынжылмасқа амалың қалмайды.
Иә, өмір бір орында тұрмайды. Алдағы кезде де талай күрделі жөндеулер өткізілер. Тендерлер ойналар. Сол кезде мемлекет қаражатының текке рәсуа болмағанына, істің сапалы жүрзілгеніне не жетсін?
Темір ҚҰСАЙЫН,
«Егемен Қазақстан».
Батыс Қазақстан облысы,
Казталов ауданы.