«Eco Milk-тің» жаңа өнімі

Өңірге танымал «Eco Milk» ЖШС жаңа ірімшік цехын іске қосты. Қазір мұнда дайын өнім тесттік сараптаудан өткізілуде. Өткен жылдың желтоқсан айында құрылысы аяқталған өндіріс ошағында Германияның озық технологиясына негізделген заманалық жабдықтар орнатылды. Астананың азық-түлік бел­деуін нығайту мақсатындағы жоба­ға 740 миллион теңге инвестиция жұ­мылдырылды. Бұл қаржы өндіріс орнын құруға, сүтті қайта өңдеу және сақтау жабдықтарын сатып алуға, дербес зертхана ұйымдастыруға, газбен, электрмен және сумен қамтамасыз ету құрылғыларын орнатуға жұмсалған. Сондай-ақ, СанПИН талаптарына сәйкес санитарлық өткізгіш, гигиеналық станса жаб­дықталды. Көп ұзамай жобалық қуатына енетін өндіріс ошағында 110 адам тұрақты жұ­мыспен қамтылатын болады. Цех өнім­дерін Астана қала­сымен бірге Қара­ғанды, Көкшетау, Петропавл, Пав­лодар қалаларының сауда нүкте­леріне  жөнелту жоспарланып отыр. Бақберген АМАЛБЕК, «Егемен Қазақстан». Ақмола облысы, Ақкөл ауданы.