Өңірлерде, әсіресе, ауылдық жерлерде жаңа жұмыс орындарының ашылуы – жаңалық. Бұл халық тұрмысына қажетті нәрсе өндіру арқылы ел экономикасын арттыруға үлес қосамын деген мақсатты ұстанса – қуаныш.
Маңғыстау ауданының орталығы Шетпе ауылында ұн шығаратын цех ашылды. Комбинат тәулігіне 3 тонна ұн өндіреді. Маңғыстау облыстық коммуникация қызметі ұсынған мәліметте қазір цехтың ауыл тұрғындарының қажеттілігін өтеп отырғаны айтылады. Әзірге тұтынушылардың әкелген бидайын тартып беру жұмыстарын ұйымдастыратын кәсіпкер алдағы уақытта астықты өңірлерден бидай әкеліп, ұн шығаруды жоспарлап отыр.
Бұл кәсіпті бастау үшін «Сегізбай Ата» өндірістік кооперативінің басшысы Мұхтар Қармысов заманауи үлгідегі құрылғыны сатып алу үшін «Каспий» әлеуметтік-кәсіпкерлік корпорациясы арқылы 10 млн теңге қайтарымды қаржы алған. Сатып алған аппараты бидайды тазалап, шаңын қағып, тартып шығарады, ал қуатына келсек күніне 5 тоннаға дейін ұн өндіруге қауқарлы.
– Қазір комбинат 2 адамды тұрақты жұмыспен қамтып отыр. Болашақта цехтың қуаттылығын арттырып, қызметкер санын көбейтуді көздеп отырмын, – дейді М.Қармысов.
Жергілікті тұрғындар жеке кәсіпкердің қызметіне сәттілік тілеп, кәсібінің арнасы кеңейіп, халыққа көрсетер қызметінің баянды болуына тілек білдіруде.
Маңғыстау облысы