Бүгін Атырау облысында Каспий теңізінің жағалауындағы қамыс өртін сөндіру қайта жалғасты, деп хабарлайды Egemen.kz.
Каспий теңізінің жағалауындағы қамыс 5 қазаннан бері өртеніп жатыр. Қамыс өртін сөндіру үшін 7 қазанда «МИ-8» (АМТ) ВСУ-5 су ағызу құрылғысы бар тікұшағымен әуеден барлау жүргізілді. Барлау кезінде қамыс өртінің екі фронтальды ошағы анықталды. Өртті сөндіру үшін Құрманғазы аудандық төтенше жағдайлар бөлімі мен №7 өрт сөндіру бөлімінің жеке құрамынан 11 қызметкер, қосымша күштер мен құралдар тартылды.
«Жеке құрамның қызметкерлері 7 қазанда сағат 12:30-дан сағат 17:30-ға дейін 12 гектар аумақтың өртін өшірді. Ал, 8 қазанда Каспий теңізінің жағалауында жанып жатқан өрт ошақтарын сөндіру жұмыстарына облыстық төтенше жағдайлар департаментінің 23 қызметкері, 4 бірлік техника, 4 мотосорғыш жұмылдырылды. Жану ошағына жақын орналасқан су көзін іздеу мақсатында «Қазавиақұтқару» АҚ батыс өңірлік филиалының «МИ-871» тікұшағы сағат 12:12-де әуеге көтеріліп, 5 шақырым қашықта орналасқан су қоймасын анықтады. Су қоймасынан су тасу арқылы «МИ-871» тікұшағы ВСУ-5 су ағызу құрылғысымен жану ошақтарына әуеден 30 тонна су төгілді. Өрттің жалпы аумағы 150 гектарды құрады. Жалын шарпыған 50 гектар аумақтағы өрт сөндірілді» деп хабарлады облыстық төтенше жағдайлар департаментінің баспасөз қызметі.